Ötən gün bütün dünyanın diqqəti Türkiyədə keçirilən referenduma yönəlmişdi. İlkin nəticələrə əsasən seçicilərin 51.29 faizi konstitusiya dəyişikliyinə “hə” dedi. Bu isə xalqın Prezident Rəcəb Tayyib Ərdoğanın siyasətinə verdiyi böyük dəstəyin göstəricisi idi. Türkiyədə keçirilən referendum Azərbaycanda da böyük maraqla və diqqətlə izlənildi. Millət vəkili, politoloq Aydın Mirzəzadə “Eurasia Diary” portalına qardaş ölkədəki referendumla bağlı fikirlərini bildirib. Politoloqun fikirlərini təqdim edirik:
"Sözsüz ki, Azərbaycan, Türkiyə xalqına seçimində həmişə hörmətlə yanaşır. Bu seçkilərdə də Türkiyə xalqının ən düzgün seçim etdiyini düşünürük. Türkiyə 100 illik Cümhuriyyət tarixində keyfiyyətcə yeni bir səhifə açır. Hakimiyyət qolları arasında sərhədlər dəqiqləşir, ölkə qarşısında duran problemlərin həlli ilə bağlı daha çevik siyasət yerinə yetirmək mexanizminə malik olur.
Düzdür referendumda qalibiyyət kiçicik səs çoxluğu ilə əldə edildi. Amma bununla belə demokratiyadı. İnanırıq ki zaman gələcək azlıqda qalanların da həm hüquqları qorunacaq, həm də onlar gələcəkdə bu idarəetmə sisteminin səmərəliliyini müdafiə edənlərdən birinə çevriləcəklər.
Türkiyənin qarşısında böyük problemlər durur. Avropa ilə Türkiyə arasında olan müəyyən anlaşılmazlıq, terrorla gündəlik mübarizə, Suriya böhranının birbaşa onun sərhədində baş verməsi Türkiyənin daxili və xarici siyasətinə çox ciddi təsir edir. Həmçinin beynəlxalq aləmdə və beynəlxalq biznes sahəsində də Türkiyə şirkətləri öz yerini tutmaq üçün ciddi mübarizə aparırlar. Bu baxımadan yeniliyə ehtiyac vardı. Yeniliyin hansı formada olmasını isə Türkiyə cəmiyyəti özü seçdi. Türkiyənin bu imkandan istifadə edərək qarşıda duran problemlərini uğurla həll edəcəyinə inanırıq. Həmişə Türkiyənin yanındayıq. Onun uğurlarına sevinirik. Bundan sonra atacağı addımların onun milli maraqlarına cavab verəcəyini düşünürük. Hesab edirəm ki, Türkiyə nə beynəlxalq, nədəki daxili hüququ pozmadı.
Türkiyə öz suveren hüququndan istifadə etdi və özünün daxili idarəetmə sistemini seçdi. Bu idarəetmə sistemi bu gün ABŞ-da, Fransada çox uğurla fəaliyyət göstərir. Bu baxımdan Türkiyənin də bunu etməyə kifayət qədər haqqı var. Düzdü bəzi ölkələr parlament üsul-idarəsindədir. Amma bununla belə hansısa bir siyasi partiyanın 10 illiklərlə Avropanın demokratik ölkələrində hakimiyyətdə qalması və ya, Avropanın ümumi siyasi xəttinə fərqli bir siyasi kurs həyata keçirməsinə heç nə mane olmur. Bu mənada Avropanın müəyyən dairələrinin Türkiyə narahatçılığının heç bir əsası yoxdur. Türkiyədəki dəyişikliklər ölkənin maraqlarına cavab verir, Türkiyə üçündür və heç bir halda hansısa bir ölkənin əleyhinə yönəlməyib".
Müsahibəni götürdü: Taleh Quliyev