Sentyabrın 23-ü BMT baş assambleyası çərçivəsində Azərbaycan və Ermənistan xarici işlər nazirləri arasında görüş baş tutdu. Görüşdə həmsədrlərin oktyabr ayında münaqişə bölgəsinə səfər etməsi ilə bağlı razılıq əldə olunub. Bununla yanaşı Elmar Məmmədyarov və Edvard Nalbaldyan prezidentlərin görüşünü də müzakirə ediblər.
Müasir ideologiyanın inkişafı milli institutunun direktorunun müavini, tanınmış rus ekspert görüşdə müzakirə olunan məsələləri Eurasia Diary portalı üçün şərh edib.
"Bu görüşün nəticəsində heç bir sensasiya deyə biləcəyimiz nəticə əldə olunmadı.Amma əgər baş tutsa məhz prezidentlərin görüşündən irəliyə doğru addım gözləmək olar. Ehtimal etmək olar ki, məhz Prezident Əliyevlə Sarkisyanın görüşündə artıq Ermənistan tərəfindən işğal olunan torpaqların qaytarılması məsələsi müzakirəyə çıxarıla bilər. Artıq bu ehtimalla bağlı mediaya bəzi məlumatlar ötürülməyə başlanılıb. Görünür bu məlumatların həm də bir məqsədi ictimai fikri yoxlamaqdır."- ekspert belə hesab edir.
Bununla yanaşı İqor Şatrov Ermənistanın hərbi qurumlarının torpaqların Azərbaycana qaytarılması ilə bağlı sərt açıqlamalarını da prosesin bir hissəsi hesab edir. Onun sözlərinə görə , nəzərə almaq lazımdır ki, Ermənistan 2018-ci ildən sonra artıq prezident yox, parlament respublikasına çevriləcək. Bəzi qüvvələr bu prosesdən narahatdırlar və onlar da danışıqlar prosesini də pozmaq istəyə bilərlər. Çünki həmişə olduğu kimi Dağlıq Qarabağ münaqişəsi Ermənistanda daxili siyasətin əsas faktoru sayılır.