Xəbər verdiyimiz kimi, ABŞ Senatında “Dağlıq Qarabağda tammiqyaslı müharibəyə yol verilməməlidir: Birləşmiş Ştatların və ATƏT-in rolu” mövzusunda brifinq keçirilib. Bu dinləmələr həmçinin, tammiqyaslı müharibənin istisna edilməsilə bağlı Eurasia Diary millət vəkili Aydın Mirzəzadənin münasibətini öyrənib.

Millət vəkili bildirib ki, problemin həlli bugün dünya siyasətinin gündəliyindədir və Azərbaycan özünün ərazi bütövlüyünün təmin edilməsi üçün bütün vasitələrdən istifadə edir.

"ABŞ konqresində Dağlıq Qarabağ münaqişəsilə bağlı dinləmələrin keçirilməsi onu göstərir ki, bugün Azərbaycanın həm dövlət quruculuğunda eyni zamanda, silahlı qüvvələrinin möhkəmləndirilməsilə bağlı attığı addımlar dünya birliyi tərəfindən görülür və müvafiq qiymət verilir."

Tədbirlərin keçirilməsində məqsəd əksinə, bu cür dinləmələrin keçirilməsilə Ermənistanı müdafiə etməkdir deyən Aydın Mirzəzadənin qənaətinə görə ABŞ-ın yeni administrasiyası xarici ölkələrə yardım proqramını kəskin surətdə ixtisar edib.

"Kristofer Smit isə heç bir zaman Azərbaycanı sevən bir insan olmayıb və burada məqsəd Ermənistanı ziyan çəkən bir tərəf kimi göstərmək və ona edilən yardımları artırmaqdır. Eyni zamanda çalışırlar ki, müharibə istisna olsun."

Amerika Birləşmiş Ştatlarında nüfuzlu dairələr müharibənin alovlanmasından narahatdırlarsa onda qoy Azərbaycanın ərazi bütövlüyünü təmin etsin deyən millət vəkili bildirir ki, Ermənistana təzyiq olaraq qoşunların çıxarılması tələb olunmalıdır.

"Yox, nə qədər ki, qoşunlar çıxarılmayıb problemin hərb yolu ilə həlli variantı  daima gündəlikdə olacaq və bunu dünyanın bütün siyasi mərkəzləri bilməlidir. Çox təəssüf ki, Ermənistana yanaşmada ikili standart sərgilənir. Dünyanın başqa bölgələrində adətən belə bir situasiyada təcavüzkar cəzalandırılır, ona qarşı sanksiyalar tətbiq olunur. Ermənistan vəziyyətində isə bu ölkəyə yardım edilir, onun məsuliyyətdən azad olunması üçün müxtəlif variantlara əl atılır. Ancaq həyat göstərdi ki, bu cür taktika Ermənistanı zəifləməkdən, onu bu gün regionun zəif həlqəsinə çevrilməkdən xilas edə bilmədi."

Aydın Mirzəzadə bildirir ki, bugün Ermənistan əhalisi durmadan köçür, iqtisadiyyatında geriləmə var və dövlətçiliyi tənəzzüldədir. Ermənistanın aldığı ən böyük cəza onun bir dövlət kimi artıq siyasi xəritədən silinməsidir deyən millət vəkili bir daha bəyan edib ki, Azərbaycan öz suveren hüququndan istifadə edib bundan sonra da problemin həlli üçün bütün variantlardan istifadə edəcək. 

Gülnar Səlimova

Eurasia Diary