Bundan əlavə, onsuz da Suriya ərazisində terrorçular böyük ölçüdə Rusiya-Türkiyə-İran işbirliyi əsasında neytrallaşdırılıb. Yəni Amerikanın bu şəkildə müdaxiləsinə ehtiyac yoxdur. Sadəcə Amerikada görünür müəyyən qüvvələr, müəyyən mərkəzlər, Pentaqon, Dövlət Departamenti və ya Mərkəzi Kəşfiyyat İdarəsi düşünürlər ki, Suriyaya artıq Rusiya-Türkiyə-İran üçlüyü hakim ola bilər və Amerika bu üç dövlətlə münasibətləri hamar deyil. Üçündən ancaq Türkiyə keçmişdə strateji tərəfdaş və müttəfiq olub amma son illər Türkiyə ilə münasibətdə də xeyli gərginlik yaradıb. Gərginliyin də səbəbləri bəllidir. Əl-Qaidə Suriyadakı kürdlərə silah-sursat ötürürdü, Fətullah Güləni ekstradisiya etmir və o Pensilvaniya ştatında yaşayıb yenə öz tərəfdaşlarına rəhbərlik edir. Halbuki 2016-cı ildə çevrilişə cəhd nəticəsində 250  türk vətəndaşı qətlə yetirildi. Və Amerikada başqa məhkəmə çəkişmələri gedir ki, hədəf yenə də Türkiyədir. İndi üstəgəl də 30 min nəfəri silahlandırmağa qərar veriblər. Əlbəttə indiki vəziyyətdə Amerikanı Türkiyənin strateji tərəfdaşı, hətta tərəfdaşı adlandırmaq bir qədər doğru olmaz. ABŞ-ın məqsədi odur ki, Suriyada o da varlığını qorusun və Rusiya Türkiyə İran maraqlarına qarşı bir müqavimət göstərsin. Amma məncə gecikmiş addımdır. Əgər Amerika orda rol oynamaq istəyirdisə elə Barak Obamanın dövründə fəallaşa bilərdi. Barak Obama o vaxt ehtiyatlı siyasət yürütdü. Baxmayaraq ki, deyirdi ki, Əsəd kimyəvi silahdan istifadə etsə bu onun üçün qırmızı cizgi olacaq amma kimyəvi silahdan istifadə olundu, Barak Obama yenə addım atmadı. Tramp gəldi. Tramp bir ara Şimali Koreya ilə kəllə-kəlləyə gəldi. İndi amma yenidən o məsələ də bir qədər fasilə götürdü. İndi də Suriyada aktivləşmək istəyir. Amma bu aktivləşmə Amerikanın özünə ziyandır. ABŞ İkinci dünya müharibəsindən Sovetlər Birliyi dağılana, 90-cı illərə qədər Türkiyənin strateji müttəfiqi olub, Türkiyəni SSRİ-dən qoruyub. İndi o illərin sınağından çıxmış Türkiyə kimi müttəfiqi artıq özü üçün itirib.

ABŞ-ın dediyinə görə Türkiyə ordusunun Afrinə daxil olması zamanı müqavimət olmayacaq, Türkiyənin maraqları əleyhinə deyillər, amma sonrakı aylarda atdıqları addımların tamamı Türkiyə əleyhinədir. Elə onlara radikal kürdlərə silah verməyin özü Türkiyə əleyhinədir. Çünki o silahlar avtomatik keçir PKK-nın əlinə, PKK da Türkiyə ərazisində terror əməlləri törədir. Hətta buna qədər atdığı addımlar da Türkiyə əleyhinə idi. Və Amerikanın Türkiyə əleyhinə siyasətinin radikal dəyişəcəyini mən gözləmirəm.