ABŞ hələ ki, əsas diqqəti Rusiyanın müdafiə sənayesi sahəsindəki zavodlara və “Rostex”ə yönəldib.
Bu sözləri sabiq dövlət müşaviri Qabil Hüseynli deyib. Politoloq yeni sanksiyaların Rusiya iqtisadiyyatına çox ciddi zərbə vuracağını bildirib:
“Çünki Rusiya bundan sonra müasir texnologiyalara əsaslanan şirkətlərlə əməkdaşlıq edə bilməyəcək. Əvvəla, bu şirkətlərin bir çoxu artıq Rusiyadan çıxıb. Yerdə qalanları da yeni sanksiyalardan sonra Rusiyanı tərk edəcək. ABŞ hələ ki, əsas diqqəti Rusiyanın müdafiə sənayesi sahəsindəki zavodlara və “Rostex”ə yönəldib. ABŞ Rusiyanın yeni silahlar istehsal etməsini və Moskvanın xaricə silah satışını əngəlləmək istəyir”.
Politoloq qeyd edib ki, Konqres Rusiya üçün sanksiyaların üçüncü fazasını hazırlayır:
“Bu, Rusiya üçün daha ölümcül zərbə olacaq. Çünki həmin mərhələdə əsas zərbə Rusiyanın maliyyə-bank sisteminə dəyəcək. Söhbət Rusiyanın SWIFT sistemindən çıxarılmasından gedir”.
Q.Hüseynli bildirib ki, sanksiyalar siyahısında beş azərbaycanlının olması narahatlıq doğurur:
“Çünki sözügedən şəxslərin Azərbaycanda kommersiya strukturları var. Doğrudur, bunlar onların ümumi əmlakı fonunda çox cuzidir və Azərbaycana heç bir ziyanı dəyməyəcək. Ancaq hər halda super ABŞ-Rusiya münaqişəsinin yeni mərhələsi başlayıb. Hətta bu, faktiki ABŞ-ın Rusiyaya müharibə elan etməsi kimi də qiymətləndirilir. Rusiyaya qarşı yeni sanksiyaların tətbiqi və digər sanksiyalar sisteminin də gündəmdə olması onu göstərir ki, 2018-ci ilin martında prezident seçkilərinə qədər Rusiya iqtisadiyyatı ağır zərbələr alacaq və nəticədə ölkədə sosial vəziyyətin ağırlaşması kütləvi etirazlara səbəb olacaq. Bu proseslərə xaricdən müəyyən dəstək ehtimalını da nəzərə alsaq, Rusiyada prezident seçkilərinin olduqca gərgin keçəcəyini öncədən proqnozlaşdırmaq mümkündür”.
Qeyd edək ki, ABŞ Maliyyə Nazirliyi Konqresə təqdim etdiyi “Kreml hesabatı” sanksiyalar paketinə 210 nəfərin adını daxil edib. Hesabatda adları yer alan şəxslərdən 114-ü Rusiyanın yüksək vəzifəli şəxsləri və dövlət şirkətlərinin rəhbərləri, 96 nəfəri isə oliqarxdır.