Bildiyimiz kimi, Türkiyədəki prezident seçkilərinin vaxtından əvvəl, daha dəqiq desək, 24 iyun tarixində keçirilməsi qərara alınıb.
Bu qərardan dərhal sonra Ana Müxalifət partiyası və İYİ partiya xüsusi fəallıq nümayiş etdirdilər. CHP bu qərardan sonra manevr işlədərək İYİ partiyaya 15 millət vəkili transfer etdi ki, bu addımı Ədalət və İnkişaf partiyası rəsmiləri, xüsusilə də Rəcəb Tayyib Ərdoğan sərt tənqid etdilər.
Bu gün isə çox maraqlı xəbərlər eşitdik Türkiyə mediyasından.
Belə ki, Cümhuriyyət Xalq Partiyasının baş vəkili Özgür Özel Abdulla Gülün namizədliyi ilə bağlı açıqlama verib. Açıqlamasında qeyd etdi ki, "Bəsdir! Bu qədər yalan xəbərlər bizi bezdirdi. Məqsədləri bizim partiya daxilində münasibətlərimizi korlamaqdır. CHP-nin gündəmində Abdulla Gül deyə biri olmadı, indi də yox və olmayacaq da ! "
Təbii ki, bu açıqlamaya bir neçə şərh bildirmək olar.
Əvvəla bu açıqlamanın Abdulla Gül ilə gizli danışıqdan sonra açıqlandığını düşünürəm. Bəs A. Gül nəyə görə namizəd kimi çıxış etmək istəməsin?
Onu qeyd etməliyəm ki, Gül Ədalət və İnkişaf partiyasının qurucusu olan əsas fiqurlardan biridir. Bu mənada hesab edirəm ki, Gül publikanı nəzərə aldı. Çünki, daha dərindən analiz etdikdə görərik ki, əgər əvvəlki illərə qədər qurucularından biri olduğu AK partiyasının timsalında Türkiyənin uğurları üçün çalışan Gül öz ideologiyasına dönükmü çıxdı, dedirtmək istəmədi !
İkinci növbədə isə Gül hesab edə bilər ki, Ərdoğana qarşı heç bir şansı yoxdur və bu səbəbdən də imicinə zərər gətirməyə dəyməz.
Digər bir tərəfdən isə Əhməd Davudoğlu ilə görüşdən sonra da Ə.Davudoğlu bu mənada Gülə təsir göstərə bilər. Çünki, Əhməd Davudoğlu özü də AK partidə Millət vəkili, xarici işlər naziri, eyni zamanda da baş nazir vəzifələrində çalışıb.
Təbii ki, buna səbəb Meral Akşener amili də ola bilər. Müxalifət partiyalarında Abdulla Gülün qeyd olunduğu zaman da Meral Akşener deyirdi ki, öz namizədliyimi irəli sürəcəm. Təbii ki, bu hal Kemal Kılıçdaroğluna da sərf edir. Çünki, kim namizəd olursa olsun özü olmasın prinsipi ilə hərəkət edir. Belə ki, əgər öz namizədliyini irəli sürsə K.Kılıçdaroğlu Ərdoğana məğlub olacağını dəqiq bilir. Bu səbəbdən də Meral Akşenerlə görüş keçirildi. Görüşdən sonra Meral Akşener rəsmən namizəd olduğunu ictimaiətə bildirdi.
Müxalifət partiyalarının əsas məqsədi birinci turda Ərdoğanın qalib gəlməsinin qarşısını almaqdan ibarətdir. Əgər seçimlər ikinci tura qalsa AK partiyanın işi olduqca çətinləşir. Çünki, bu halda digər müxalif partiyalar öz səslərini ikinci yerdə olan başqa müxalif partiyaya verə bilər.
Burada əsas diqqət Ərdoğanın hansı addımı atacağı ilə bağlı olacaq. Düşünürəm ki, hazırki iqtidar partiyası manevr işlədəcək. Belə ki, hazırki prezident R.T.Ərdoğan iqtisadi sahədə yeni qərar və ya layihə planlaşdıra bilər. Bunun əsas məqsədi isə ölkədəki mövcud iqtisadi vəziyyət səbəbindən narazı qüvvələri ələ almaqdan ibarət ola bilər.
Digər addımlar da atıla bilər ki, bununla da Ərdoğan əslində belə bir ictimai rəy formalaşdırmağa çalışacaq ki, "Bizi bu vəziyyətdən yalnız Ərdoğan xilas edə bilər"! Bu mənada Türkiyənin Yaxın Şərqdə də fəallığını artıracağını gözləyirəm. Xüsusilə də, Menbiçə girməklə bağlı iddialarını sürdürə bilər !
Rusif Məmmədov,
Qərbi Kaspi Universitetinin Tətbiqi Politologiya Mərkəzinin eksperti