Gürcüstanda keçən cümə günü gözlənilməz halda kütləvi etirazlar baş qaldırdı. Belə ki, mayın 12-də gecə saatlarında Tiflisdəki məşhur ''Basiani'' və ''Cafe Gallery'' gecə klublarında polis əməliyyat keçirərək 8 nəfər gənci narkotik alveri ilə məşğul olmaqda ittiham edərək həbs edir. Hadisə şahidlərinin bildirdiyinə görə, polisin əməliyyatı çox sərt üsulla həyata keçirilir. Bundan sonra polis ertəsi gün bir neçə şəxsi mənzildə və obyektlərdə axdarışlar həyata keçirir. Həmin hadisənin bir gün sonra isə Tiflisdə gözlənilməz halda yüzlərlə şəxs toplaşaraq aksiya keçirirdilər.
Aksiyada əvvəlcə yalnız həbs olunan gənclərin azad edilməsi və polisin şiddətinin dayandırılması tələb olunur. Sonra da hadisə yerinə xeyli sayda jurnalist gələrək mitinqi işıqlandırmağa başlayır. Mitinqçilərin qarşısına çıxan müxalif ''Ağ Səs-Küy Hərakatı''nın lideri Beka Çikaraşvili siyasi tələblər irəli sürməyə başlayır. O, baş nazir Georgi Kvirikaşvilinin və ''öz xalqına divan tutan'' daxili işlər naziri Georgi Qaxariyanın dərhal istefaya göndərilməsini, həbs olunan gənclərin dərhal azad edilməsi və zor tətbiqində iştirak etmiş hüquq-mühafizə orqanı əməkdaşlarının cinayət məsulliyətinə cəlb olunmasını, eləcə də hakim partiyanın öz siyasi kursunu dəyişməsini tələb edir. Daha sonra jurnalistlərin suallarını cavablandıran müxalif lider bildirib ki, aksiyaçıların əsas niyyəti ölkədə növbədənkənar parlament seçkiləri yolu hakimiyyəti dəyişdirməkdir. Aksiya sosial şəbəkələrdə də böyük marağa səbəb olub. Artıq 10 min nəfərə yaxın insan hökumət əleyhinə olacaq növbəti mitinqdə iştirak edəcəyini bildirib.
Bu hadisələrin birdən-birə bu məcrada inkişaf etməsinin səbəbləri və vaxtı çox maraqlıdır. Bu hadisələri doğuran səbəb Gürcustanda mövcud hökumətin hakimiyyəti dövründə gözəçarpacaq bir iqdisadi uğurun qazanılmamasıdır. Həmçinin, ölkədə faktiki olaraq keçmiş hakimiyyətin zamanında olan demokratik azadlıqlar yoxdur. İvanaşvilinin nəzarət etdiyi Margelaşvili-Kvirikaşvili cütlüyü Gürcüstan üçün əməli bir uğura imza ata bilmədi. Sadə gürcülərin bir çoxu bu səbəblərdən dolayı Saakaşvili hakimiyyətinin intizarı ilə yaşayır. Hadisənin başqa siyasi səbəbləri isə Ukraynada siyasi həyatı faktiki olaraq bitmiş Saakavşilinin Gürcüstanda hakimiyyət uğrunda mübarizəyə qoşulacağını bildirməsindən və indiki hakimiyyətin ''boz kardinalı'' olan məşhur oliqarx Bidzina İvanaşvilini iqtidardakı ''Gürcü Arzusu'' Partiyasının sədri seçilməsindən sonra baş verdi.
Saakaşvili daxil bütün müxaliflər yaxşı başa düşür ki, yenidən hakimiyyətə gəlmək istəyən İvanaşvilinin əsas məqsədi ölkədə tam hakimiyyətə sahib olmaqdır. Bundan sonra isə onu hakimiyyətdən göndərmək çox çətin olacaq. Buna görə də vaxtında onu hakimiyyətdən salmaq istəyirlər. Ancaq hadisələr müvvəqəti də olsa səngidi. Buna səbəb isə hadisə yerinə daxili işlər naziri Georgi Qaxariyanın və Tiflisin meri Kaxe Kaladzenin gəlib etirazçılardan üzr istəməsi və bəzi vədləri verməsi oldu. Buna rəğmən sosial şəbəkələrdən edilən çağırışlarda bir müddət sonra aksiyalara yenidən start veriləcəyindən bəhs olunur. Faktiki olaraq hadisələri idarə edən müxalif lider Beka Çikaraşvilinin isə əsas məqsədi növbədənkənar parlament seçkiləridir. Zənnimcə ilin sonuna qədər Tiflis yenə də gərgin siyasi atmosferə ev sahibliyi edəcək. Gürcüstanda yeni hakimiyyət dəyişikliyinin olub-olmayacağına isə təbii ki, gürcü xalqı özü qərar verəcək.
Qərbi Kaspi Universitetinin Tətbiqi Politologiya Mərkəzinin eksperti Zeynalabid Əmrəliyev