ABŞ iyunun ortasında Çin istehsalı olan mallara 25 faizlik rüsum tətbiq edəcəyini bəyan edib. Bununla bağlı politoloq Elçin Mirzəbəyli Eurasia Diary-ə açıqlama verib.
Onun sözlərinə görə Trampın seçki öncəsi vədlərindən biri ABŞ-da daha əlverişli biznes mühitinin yaradılması və ucuz işçi qüvvəsinə görə Yaponiya və Cənubi Koreya istisna olunmaqla digər Asiya ölkələrinə, o cümlədən Çinə yatırılan sərmayələrin ölkəyə qaytarılmasıdır. Bununla bağlı ABŞ-da artıq vergi islahatı həyata keçirilib və şirkətlər üçün vergilər 35%-dən 21%-ə endirilib. Bu çox böyük vergi güzəştidir və ABŞ-da investisiya və biznes mühitinin yaradılması üçün əlverişli imkanlar açır. Çin mallarına əlavə vergilərin tətbiqinə gəldikdə isə bu ilkin mərhələdə bütövlükdə 50 milyard dollarlıq məhsullar siyahısına aid ediləcək. Daha öncə söhbət 150 milyard dollarlıq məhsulların siyahısından gedirdi. Çinə qarşı ən sərt qərarın qəbulu isə iyunun sonlarında gözlənilir. Belə ki, ABŞ iyun ayının sonlarında Çin şirkətlərinə investisiya məhdudiyyəti və sərt ixrac nəzarəti tətbiq etmək niyyətindədir. Bu isə sənaye əhəmiyyətli texnologiyaların əldə edilməsində Çin şirkətlərinə müəyyən məhdudiyyətlər yarada bilər", deyə politoloq qeyd edib.
"Mütəxəssislər baş verənləri “ticarət müharibəsi” adlandırırlar və təbii ki, iqtisadi müstəvidə baş verənləri belə dəyərləndirmək olar. Çünki 2030-cu ilədək Çin iqtisadiyyatının ABŞ iqtisadiyyatını geridə qoya biləcəyi ilə bağlı proqnozlar Vaşinqtonu daha sərt tədbirlərə əl atmağa sövq edir. Amma ortalıqda olan rəqəmlər fərqli məqamlardan xəbər verir. 2018-ci ilin yanvar-aprel aylarında ABŞ-la Çin arasındakı ticarət dövriyyəsi 13,3% artıb. Məntiqlə “ticarət müharibəsi” azalmaya səbəb olmalıydı. Bu baxımdan ABŞ-la Çin arasındakı “ticarət müharibəsi”ndə izahı çətin olan kifayət qədər ciddi məqamlar var. Zənnimcə, baş verənlərin mahiyyəti haqqında yaxın bir neçə ay ərzində daha aydın təsəvvürlər yarana bilər", deyə ekspert bildirib.