Rusiya Prezidenti Vladimir Putin futbol üzrə dünya çempionatına milyardlarla dollar pul xərclədi, yeni stadionlar tikdi, milyondan çox azarkeş Rusiyaya səfər edib, üstəgəl dünyanın aparıcı televiziya kanalları Rusiyadan 1 ay ərzində verilişlər yayınlayacaqlar. Yəni dünyada 1 ay hamı Rusiyadan və rusların qonaqpərvərliyindən danışacaq. Ona görə də Putin bu yarışa xüsusi önəm verir, həm özünün, həm də Rusiyanın müsbət imicinin formalaşdırılmasına çalışır.
Bunu politoloq Elxan Şahinoğlu deyib.
Politoloq qeyd edib ki, Putini ən çox narahat edən çempionat boyu yaxın ətrafda sakitliyin pozula biləcəyidir:
“Məsələn, Putin çox ehtiyat edir ki, Ukrayna ordusu məqamdan istifadə edərək Donbas separatçılarına qarşı hücum əməliyyatları həyata keçirə bilər. Bu baş versə, çempionata ciddi zərər dəyəcək. Təsadüfi deyil ki, Rusiya prezidenti ötən həftə bununla bağlı suala cavab verərkən əvvəlcədən hazırladığı cümləni işlətdi: “Ukrayna futbol çempionatı dövründə təxribat törətsə, başına elə oyun açarıq ki…”
Putin Azərbaycanla Ermənistan arasında təmas xəttində də heç olmazsa 1 ay atəşkəsə riayət edilməsini arzulayır. Təsadüfi deyil ki, Putin çempionatın açılışı sırasında Nikol Paşinyanı Azərbaycan Prezidenti İlham Əliyevlə tanış edib və liderlər bir-birlərinin əllərini sıxıblar. Atəşkəsin kövrək olduğunu bilirik. Ancaq hər halda Moskvada çempionatın açılışına qatılan liderlər Putinin xahişini də yerə salmayacaqlar”.
