“Paşinyanın hakimiyyətə gəlməsindən 100 gün keçməsinə baxmayaraq, o, hələ də çalışır ki, hakimiyyətdəki mövqelərini möhkəmləndirsin”.
Bu sözləri politoloq Elşad Mirbəşiroğlu böhran vəziyyətində olan Ermənistandanın daxili vəziyyətini şərh edərkən deyib. O bildirib ki, bu gün reallıq ondan ibarətir ki, Paşinyanın hakimiyyətdəki mövqeləri olduqca zəifdir və atdığı addımlar heç də gözlədiyi nəticələri vermədi:
“Sadəcə olaraq bu gün Paşinyanın hakimiyyətdə olmasının səbəbi kənardan gələn dəstəkdir. Çünki hazırda Ermənistanda nə qanunverici orqan səviyyəsində, nə də inzibati idarəçilik səviyyəsində Paşinyana dəstək var. Bu isə o deməkdir ki, Paşinyanın köhnə komandası öz mövqelərini çətinliklə də olsa qoruyub saxlamaqdadır. Bu cür şəraitdə təbii ki, Paşinyan bilir ki, onun vəziyyəti olduqca kritikdir və özünü narahat hiss edir. Bildiyiniz kimi avqust ayında Paşinyanın hakimiyyətdə olmasının 100 günü tamam oldu və bu münasibətlə o, genişmiqyaslı mitinq keçirdi. Bu 100 gün ərzində onun əsas məqsədi ətrafına çoxsaylı tərəfdaşlar yığmaq idi. Bunun altında isə Rusiyaya, eləcə də bu məsələdə maraqlı olan digər dövlətlərə öz gücünü sübut etmək dayanırdı.
Cəmiyyətin ona dəstək verdiyini göstərərək, qanunvericilik səviyyəsində öz mövqelərini möhkəmləndirib konstitusiyada dəyişikliklərdən başlayaraq digər alternativ addımlarını ata bilsin. Konstitusiya dəyişikliyi ilə bağlı irəli sürdüyü dəyişikliklər təbii olaraq birmənalı qarşılanmır. Nəzərə almaq lazımdır ki, Paşinyanın Ermənistan parlamentində qətiyyən dəstəyi yoxdur. Əsas söz haqqı Ermənistanın Respublika Partiyasındadır. Partiya rəsmiləri ilə Paşinyan arasında sərin yellər əsməkdə davam edir. Onu da unutmaq olmaz ki, keçmiş baş nazir və Ermənistanın keşmiş prezidenti olmuş Serj Sarkisyanın dövründə özünə maliyyə imperiyası yaratmış şəxslərlə Paşinyanın fikirləri arasında fərqlər var. O, onların ideyaları üzrə hərəkər edərək hakimiyyətdə qala bilsə də, digər tərəfdən insanların dəstəyini itirəcək. Bu isə olduqca risklidir, çünki heç kim ona hakimiyyətdə qalacağına dair zəmanət vermir. Bu baxımdan Paşinyan özünü bu gün Ermənistanda davam edən gərgin sosial-iqtisadi və siyasi vəziyyətin girovluğunda hiss edir. Düşünmürəm ki, o, hakimiyyətdə uzun müddət öz mövqeyini qoruyub saxlaya bilsin. Robert Koçaryanın həbsi, yenidən azadlığa buraxılması və siyasi meydana atılması onu göstərir ki, ölkə daxilində cərəyan edən proseslərin hər biri Paşinyanın əleyhinə gedir ”. (publika)