“Suriyada Türkiyənin əsas hədəfi YPG terror təşkilatının fəaliyyətinə son qoymaq, cənub sərhədlərinin təhülkəsizliyini təmin etməkdir. Türkiyə Şərqi Fəratda başlayacağı əməliyyatlarla bu bölgədə və Menbiçdə YPG-nin müstəqil dövlət qurmaq planının da qarşısını almaq niyyətindədir”.
Eurasia Diary teleqraf.com-a istinadla xəbər verir ki, bunu politoloq Məhəmməd Əsədullazadə deyib.
Ekspert hesab edir ki, Türkiyə bölgədə YPG-ni neytrallaşdırmasa, əraziləri təhdid altında qalacaq:
“Buna görə də Türkiyə rəhbərliyi Suriyada növbəti əməliyyata başlamaqda israrlıdır. Artıq Rusiya və ABŞ Türkiyənin qarşısına keçəcək gücdə deyillər. ABŞ Türkiyəsiz Suriyada müsbət nəticə əldə edə bilməyəcəyini başa düşərək, Menbiç və Fəratın şərqindəki hərbi qüvvələrini geri çəkməklə YPG-yə verdiyi dəstəyi də dayandırır. Bu, Ankaraya “yaşıl işıq” yandırmaqdır. Qənaətimə görə, türk ordusu yay aylarına qədər bölgəni PKK və YPG-dən təmizləyə biləcək”.
Məhəmməd Əsədullazadə qeyd edib ki, ABŞ-la yanaşı, Rusiya da Türkiyənin bölgədə əməliyyatlara başlamasına razılıq verib: “Çünki Türkiyə Suriyaya qarşı ərazi iddiası irəli sürmür. YPG ABŞ-ın maraq dairəsində olduğu üçün bu təşkilatın zərərsizləşdirilməsi Rusiyanın maraqlarına uyğundur.
Başqa sözlə, Türkiyə Afrin və Əl-Babda olduğu kimi Menbiç və Fəratın şərqini YPG və İŞİD-dən təmizləməklə, cənub sərhədlərinin təhlükəsizliyini təmin edəcək”.
Politoloq bildirib ki, ABŞ YPG-ni gücləndirməyə çalışsa da, bu strateji planını həyata keçirə bilmədi: “Buna görə də, ABŞ və Türkiyə arasında ciddi problemlər yaşandı. Donald Tramp Türkiyə Prezidenti Ərdoğandan telefonla danışdıqdan iki gün sonra Amerika qoşunlarının Suriyadan çıxarması təsadüfi deyil. Bu, son aylarda gedən gizli danışıqların nəticəsi idi.
Digər yandan, Bəşər Əsədin türk ordusunun girməyə hazırlaşdığı Menbiçdə YPG ilə anlaşması barədə məlumatlar yayılıb. Buna görə də düşünürəm ki, Türkiyə Menbiçə daxil olarsa, Suriya qüvvələri ilə üz-üzə gələ bilər. Bu da Rusiya-İran-Türkiyə ittifaqına son qoya bilər.
Buna görə, başqa bir ehtimal da mümkündür ki, Əsəd ordusu burada qalmaq şərtilə YPG bölgədən çıxsın. Ötən günlərdə Türkiyə rəsmiləri Moskvada oldular, mümkündür ki, bununla bağlı hansısa razılaşma əldə edilib”.
Qeyd edək ki, Türkiyə Prezidenti Rəcəb Tayyib Ərdoğan Fərat çayının şərq sahillərində əməliyyata başlayacaqlarını açıqlayıb.
O, əsas hədəfin bölgədəki PYD/YPG terror təşkilatı olduğunu bildirib.