Amerikalı siyasi ekspert, Qarabağ münaqişəsi üzrə məşhur “Qobl planı”nın müəllifi Pol Qobl ABŞ siyasəti və Cənubi Qafqaz regionundakı siyasi proseslər barədə Eurasia Diary-ə eksklüziv açıqlamalar verib.

İlk olaraq ABŞ-ın Azərbaycandakı yeni səfirinin təsdiqlənməsinə münasibət bildirən Qobl qeyd edib ki, səfirlər çox az hallarda siyasətin dəyişməsinə təsir edə bilirlər: "Burda da dəyişikliyə inanmıram. Lakin təbii ki, yeni səfirin iki dövlət arasındakı münasibətlərə yeni abu-hava qatacağını düşünürəm. Cənab Litsenberqer hələ müşavir olduğu zamanlarda Azərbaycan və Cənubi Qafqazla bağlı özünəməxsus fikirləri ilə seçilirdi. Xüsusilə onun Azərbaycanla hərbi-siyasi əməkdaşlığın intensivləşdirilməsi məsələlərində aktiv fəaliyyət göstərəcəyini hesab edirəm".

Dağlıq Qarabağ münaqişəsi və danışıqların perspektivi ilə bağlı isə fikirlərini bölüşən Qobl, bu sahədəki vəziyyəti “çıxılmaz" hesab edir: "Nə Bakı, nə də İrəvan dramatik dəyişikliklərin əldə olunmasına hazır deyillər. Münaqişənin həlli üçün hər iki tərəf kompromisə getməyi bacarmalıdır".

"ABŞ-ın Cənubi Qafqaz siyasətində hansı dəyişikliklər gözlənilir" sualını ekspert belə cavablandırıb: “Tramp hazırda əsas diqqətini daxili işlərə yönəldib. Hesab edirəm ki, o, Cənubi Qafqaz da daxil olmaqla, bir çox regionlara laqeyd yanaşır. Ancaq fikrimcə, ABŞ İrana qarşı yeni tədbirlər planlaşdırdığı zaman regional siyasətində ciddi dəyişikliklər müşahidə edilə bilər”.

Pol Qobl, həmçinin, ABŞ-ın qoşunlarını Suriyadan çıxarmasının Cənubi Qafqaz və digər regionlarda bu supergücün nüfuzuna təsir edəcəyini bildirib: “Əgər böyük güc regiondan çəkilirsə, yalnız həmin bölgədə deyil, ətraf ərazilərdə də təsiri azalır. Cənubi Qafqazda da belə olacaq”.

O, NATO-nun Cənubi Qafqaza doğru genişləməsi məsələsinə də münasibət bildirib: “Mən NATO-nun Cənubi Qafqaza genişlənməsini görmək istərdim. Lakin bunun Trampın zamanında baş verəcəyini gözləmirəm”.