Azərbaycan və Ermənistan Xarici İşlər Nazirlərinin yanvarın 19-da Parisdə görüşü baş tutub. Görüşdə münaqişənin əsas parametrləri və iki tərəf arasındakı münasibətlər müzakirə edilib.
Görüş sonrasında Azərbaycan Xarici İşlər Nazirliyindən görüşün təfərrüatlarıyla bağlı açıqlama verildi. Açıqlamada çox maraqlı bir nüans öz əksini tapdı. “Tərəflər danışıqlar zamanı bir sıra məsələləri, o cümlədən hər iki tərəfin əhalisinin sülhə, təhlükəsizliyə və dayanıqlı regional inkişafa hazırlanması yollarını müzakirə ediblər”.
Məhz hər iki tərəfin əhalisinin sülhə hazırlanması məsələsi və ümümi olaraq danışıqların əsas parametrləri barədə politoloq Elxan Şahinoğlu öz fikirlərini Eurasia Diary-lə bölüşüb.
Görüşlə bağlı politoloq Elxan Şahinoğlu qeyd edir ki, əslində görüşün real bir nəticəsi olmadı. Belə grüşlər sadəcə tərəflər arası dialoq mühitini qoruyub saxlamaq və dövlət başçılarının görüşü üçün zəmin hazırlamaq məqsədiylə həyata keçirilir. Buna rəğmən görüş sonrasında Azərbaycan XİN-dən verilən “hər iki tərəfin əhalisinin sülhə hazırlanması” barədə bəyanat şəxsən məndə xüsusi maraq oyatdı. Bu bəyanatı görüşün pozitiv nəticələrindən biri hesab etmək olar.
İki dövlət arasındakı münasibətlərə gəldikdəysə fikrimcə, Azərbaycan sərtliyini bir qədər artırmalıdır. Bəli, pis-yaxşı atəşkəs var və ona müəyyən səviyyədə əməl edilir. Ancaq sözügedən atəşkəs olduqca kövrəkdir və əbədi deyil.
Əlbətdəki mütamadi təmaslar dəvam etdirilməlidir, lakin Azərbaycan Ermənistanın qarşısına sərt tələblər qoymalıdır. Konkret qeyd etmək lazımdır ki, əgər Ermənistan problemin həlli üçün real addımlar atmasa bunun nəticələri ağır olacaq.
Bu il problemin həlli üçün kritik bir il ola bilər. Çünki hazırda Ermənistanda yeni hökümətini formalaşdırmış Paşinyan üçün çox çətin bir dövr başlayır. Beləki, inqilab eyforiyası bitir və artıq erməni xalqı ona verilən vədlərin yerinə yetirilməsini gözləyəcək. Ölkədəysə iqtisadi böhran getdikcə dərinləşir və xaricdən asılılıq günü-gündən artır. Belə bir vəziyyətdə Qarabağ probleminin həlli Paşinyan və Ermənistan üçün əsil hədiyyə olar. Çünki problemlərin kökündə duran əsas amil məhz Qarabağ problemidir.
Ancaq bununla belə Paşinyan Qarabağ klanından çəkinir.Qarabağ probeminin həlliylə əlaqədar real addımlar atmaqdan qorxur. Çünki bu klan hakimiyyətdən getsə də hələ də ölkədə təsirini hiss etdirir.
