Bakıda hərəkətsiz halda olan avtomobillərin öz-özünə alışması halları artıb. Belə məqamlarda sürücülər adətən necə hərəkət etmək lazım olduğunu bilmirlər. Çünki əksər sürücülərin avtomobilin motorxanası haqqında anlayışı yoxdur. Bu da kiçik alışma olan avtomobilin sürətlə yanıb kül olması ilə nəticələnir.
Eurasia Diary xəbər verir ki, mütəxəssislər avtomobillərdə baş verən yanğınlarda başlıca səbəb kimi qısaqapanmanı göstərir. Qısaqapanmanın yaranmasında isə əsas amil havada rütubət və nəmişliyin çox olmasıdır.
Hansı havada avtomobil alışa bilər?
Mütəxəssislər hesab edir ki, rütubətli havalarda avtomobillərin elektrik avadanlıqlarında izolə qatının pozulması hesabına qısaqapanma baş verir. Belə hallarda yanğın halları daha çox olur. Havaların rütubətli və bəzən də yağmurlu olmasının yanğınlarda rolu çoxdur.
Bundan başqa, avtomobilin elektrik sisteminə, naqillərinə müdaxilə səbəbindən də yanğın baş verir. Mütəxəssislər bildirir ki, bu gün avtomobillərə əlavə qurğular, siqnallar, videomonitorlar quraşdırılır. Bütün bu işlər təminatlı texniki təmir stansiyalarında həyata keçirilmir. Belə qurğu və avadanlıqlar ayrı-ayrı yerlərdə kustar üsullarla, mütəxəssis olmayan şəxs tərəfindən həyata keçirildiyindən, avtomobillər dayandığı yerdə öz-özünə alışır.
Avtomobiliniz yanarsa…
Avtomobil mütəxəssislərinin sözlərinə görə, maşında yanğın hallarının qarşısını almaq üçün sürücülər ilk növbədə avtomobillərini saz vəziyyətdə saxlamalıdır. Avtomobillərin elektrik təchizatı yoxlanılmalı, kabel və naqillərində gərginlik boşalmasının olub-olaması müəyyənləşdirilməlidir. Əgər bütün bunlara əməl edilsə, yanğın hadisələri kəskin şəkildə azala bilər.
Həmçinin sürücülər maşınlarında yanğınsöndürən balon gəzdirməlidir. Avropa və Şərq dövlətlərində istehsal edilmiş avtomobillərin konstruksiya dəstində bunlar nəzərdə tutulub.
Əgər maşında kiçik alışma baş verirsə, sürücü özünü itirməməli və tez həmin balonla yanğının qarşısını almalıdır. Öncə mühərrik sondürülməlidir. Sürücü bacara bilsə, elektirik açarını akkumlyator batareyasından ayırmalıdır ki, elektrik şəbəkəsi işləməsin.
Yanğın hansı avtomobillərdə daha çox olur?
Sürücülər diqqət etməlidir ki, ən çox yanğın köhnə buraxılış ili olan xarici maşınlarda müşahidə olunur. Son 10 ildə aparılan müşahidələrə görə, köhnə modelli xarici maşınlarda olan yanğın halları hətta sovet istehsalı olan avtomobillərdən də çoxdur. Həmin maşınların elektrik təchizatında nasazlıqlar baş verir ki, bu da özünü yanğınlarla büruzə verir.