Azərbaycan Respublikası Prezidenti cənab İlham Əliyevin 25 fevralda imzaladığı fərmana görə müharibə veteranları üçün prezidentin aylıq təqaüdünün təsis olunması nəzərdə tutulur.
Əmək və Əhalinin Sosial Müdafiəsi Nazirliyindən verilən məlumata görə, sərəncama uyğun olaraq, aprelin əvvəlindən müharibə veteranlarına kommunal, nəqliyyat və digər xidmətlərə görə sosial müavinət (55 manat) əvəzinə, habelə döyüşən ordunun tərkibində xidmət etmiş müharibə iştirakçılarının əmək pensiyasının sığorta hissəsinə əlavə (11 manat) əvəzinə Prezidentin 80 manat məbləğində aylıq təqaüdü təyin olunacaq.
Hərbi jurnalist və yazıçı Rey Kərəmoğlu Eurasia Diary-a açıqlamasında fərmanın mahiyyətini olduqca əhəmiyyətli hesab edir.
"Ümumiyyətlə prezident təqaüdü bir statusdur, artıq bütün müharibə veteranları prezident təqaüdcüsüdür. Bu mənəvi bir məsələdir", deyə hərbi jurnalist bildirib.
O bildirir ki, 2001-ci ilə qədər müharibə veteranlarına kommunal xidmətlərdə güzəştlər edilirdi, lakin 2001-ci ildən sonra qanunvericiliyə görə bu güzəştlərin yerinə dövlət tərəfindən kompensasiya verildi.
Daha sonra isə kompensasiya sosial müavinətlərlə əvəz olundu. Sonuncu qanunvericiliyə görə isə müavinətin miqdarı 55 manat təşkil edirdi.
"Pensiya haqqında qanuna görə vətəndaş pensiyaya çıxanda müavinət kəsilir və buna görə veteranlar sosial müavinət almırdılar", Rey Kərəmoğlu bildirirb.
Qeyd edək ki 80 min müharibə veteranının bir qismi pensiyaya çıxmış şəxslər olub və təxminən 30 minə yaxın insan 55 manat müavinətdən yararlanmırdı.
"Bununla bağlı çoxlu şikayətlər və narazılıqlar mövcud idi. Cənab prezidentin bu fərmanı narahatlıqlara son qoyacaq. Belə ki, pensiyaya çıxmış şəxslər də veteranlığa görə təyin edilən müavinətlərdən yararlanacaq", deyə Rey Kərəmoğlu fikrini tamamlayıb.
Ülvi Əhmədli