Rusiya əldən verdiyi liderlik funksiyasını yenidən bərpa etməyə çalışır.
Bu sözləri Axar.az-a Rusiyanın Xəzər donanmasının genişmiqyaslı təlimlərə başlayacağı barədə məlumatı şərh edən politoloq Tofiq Abbasov deyib. O bildirib ki, Rusiyanın hərbi təlimlərə böyük diqqət yetirməsi ilk növbədə qlobal siyasətdəki çağırışlardan irəli gəlir:
“Rusiya gözəl anlayır ki, dünyada ABŞ-ın 800-ə yaxın hərbi bazası var və onlar istənilən nöqtədə hərbi əməliyyatlara başlaya bilərlər. Təsadüfi deyil ki, dünya geosiyasətinin öncülləri Rusiyanı həm də böyük bir qitə olaraq görürlər. Ona görə də digər qüdrətli dövlətlər, o cümlədən NATO Rusiya ilə hesablaşır və qarşıdurmaya hər zaman hazır olduqlarını bəyan edirlər. Rusiya da bu baxımdan böyük güclərdən geri qalmır və müxtəlif dövlətlərin öz məqsədlərinə çatmaqdan ötrü güc amilinə əl atdığını yaxşı anlayır. Bunun bariz nümunəsinin Suriya, İraq, Əfqanıstan, Somali, Afrika qitəsində şahidi olduq. Görünür, Rusiya da geri qalmaq istəmir və yaranmış şəraitdə lazımı hazırlıqları görür. Hərbi və nüvə potensialına görə ikinci böyük dövlət olan Rusiya buna görə də liderlik funksiyasını yenidən bərpa etməyə çalışır”.
Politoloq bildirib ki, bu mənada şəraitinə görə Xəzər bölgəsi Rusiya üçün daha əlverişlidir:
“Xüsusilə də Həştərxan, Volqoqrad, Kalmık, Dağıstan bölgəsində böyük desant yerləşdirməyə imkanlar var. Rusiya da məhz buna görə Asiyanın iqlim və coğrafi şəraitinə uyğun olaraq maksimum dərəcədə hərbi potensialını artırır və istənilən qaynar bölgədə bundan istifadəyə hazırlıqlar görür. Əslində, Rusiyanın Suriyadan sonra ən son özünü Venesuelada isbatlaması heç də təsadüfi deyildi”.
Qeyd edək ki, Rusiya Hərbi Dəniz Donanmasının Xəzər donanması genişmiqyaslı təlimlərə hazırlaşır.