İnsan Hüquqlarının İnkişafı və Qlobal Dialoq üzrə BMT-nin Cenevrə Mərkəzinin icraçı direktoru, səfir İdris əl-Cəzairi dünyada sülh üçün təhlükə sayılan sürətlə silahlanma ilə bağlı Eurasia Diary-ə açıqlama verib.
Sürətlə silahlanmanı təhlükəli hadisə hesab edən BMT rəsmisi, bunun bəzi iri və orta güclü dövlətlərin yeritdiyi hegemonluq siyasətinin nəticəsi olduğunu deyib.
"Bu mövqe həmçinin, mövcud münaqişələrin dinc, tərəflər arasında danışıqlar yolu ilə deyil, silah gücünə həlli prinsipinə əsaslanır. Hələ keçmişdə bu siyasətin uğursuz olduğu sübuta yetirildi. Dünya ictimaiyyəti İkinci Dünya Müharibəsindən sonra aydın şəkildə bunun şahidi oldu", deyə səfir bildirib.
"Biz hamımız gələcəkdə münaqişələrin sülh yolu ilə həllinə ümid edir, silahlanmaya sərf edilən bu böyük məbləğlərin xalqların inkişafına yönəldilməsini istəyirik ki, dövlətlər arasında mövcud ixtilafların həllini tapaq. Hazırda qlduqca önəmli bir dövrdəyik, çoxtərəfli əməkdaşlıq təhlükə altındadır, fərdi təşəbbüslər getdikcə artır, inkişaf edir. Arzu edirik ki, dövlət rəsmiləri mövcud problemlərin həllini tapmaq məqsədilə BMT çərçivəsində bir yerə toplaşsınlar. Dövlətlər arasında ixtilaflar təbiidir, lakin onların arasında məsləhətlərin olması da zəruridir", deyə İdris əl-Cəzairi qeyd edib.
Həşim Məmmədov