ABŞ Konqresinin qərarları təmas xəttinə Azərbaycanın birbaşa nəzarətinin əngəlləməsinə istiqamətlənib | Eurasia Diary - ednews.net

23 İyul, Çərşənbə axşamı


ABŞ Konqresinin qərarları təmas xəttinə Azərbaycanın birbaşa nəzarətinin əngəlləməsinə istiqamətlənib

Ekspert rəyi A- A A+

"ABŞ Konqresinin qəbul etdiyi düzəlişlər Dövlət Departamentinin və ya Tramp administrasiyasının mövqeyi kimi izah edilə bilməz".

Bunu Eurasia Diary-ə açıqlamasında Azərbaycanın keçmiş Xarici İşlər naziri, politoloq Tofiq Zülfüqarov deyib.

“ABŞ Konqresinin qərarları heç bir ciddi mahiyyət kəsb etmir. Bunlar sadəcə qanun hökmündə qərarnamələrə edilmiş düzəlişlərdir. Və bu düzəlişlər ABŞ parlamentinin aşağı palatasında - Nümayəndələr Palatasında qəbul edilib. ABŞ siyasi sistemində xüsusən xarici siyasətlə əlaqədar vacib məsələlərdə yekun qərarlar senat tərəfindən qəbul edilir. Bu baxımdan qeyd edə bilərik ki, Konqresdəki son düzəlişlər ABŞ-ın Dağlıq Qarabağ problemi ilə bağlı mövqeyinə bir o qədər də təsir etməyəcək” – deyən T.Zülfüqarov bununla belə hesab edir ki, istənilən halda Konqresdə qəbul edilən qərarlar birbaşa erməni mövqeyini ifadə edir və bu qərarlara reaksiya verilməsi zəruridir:

“Təbii ki, əgər sözügedən düzəlişi diqqətlə incələsək görərik ki, buradakı müddəalar problemin həllindən çox dondurulmasını, təmas xəttinə Azərbaycanın birbaşa nəzarətinin əngəlləməsinə istiqamətlənib. Bu mövqe isə münaqişənin tərəflərindən sadəcə Ermənistanın mövqeyini ifadə edir və ona görə də bu mövqeyə rəsmi səviyyədə etiraz edilməlidir. Lakin qeyd etdiyim kimi bu düzəlişlər Trampın şəxsi mövqeyini əks etdirmədiyindən və qərarların ABŞ hökümətinin xarici siyasətinə təsir imkanı mövcud olmadığından biz bu qərarların ABŞ-Azərbaycan münasibətlərinə mənfi təsir edəcəyini gözləmirik”.

Qeyd edək ki, ABŞ konqresi son bir həftə ərzində ardıcıl olaraq iki dəfə Qarabağ probleminə dair Azərbaycanın əlehinə qanun düzəlişləri qəbul edib. Bu düzəlişlərdən ilki Dağlıq Qarabağda atəşkəs rejimini möhkəmləndirməyi, digəri isə Xankəndində yerləşən hava limanına uçacaq mülki aviasiya vasitələrinə Azərbaycan tərəfindən daim təhlükə törətməsinin qarşını almağı özündə ehtiva edir.

Nicat İSMAYILOV

 

 

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...