Polkovnik deputatla RAZILAŞMADI - “Tək-tək qəhrəmanlıq göstərməklə müharibə aparmaq olmaz” | Eurasia Diary - ednews.net

23 Avqust, Cümə


Polkovnik deputatla RAZILAŞMADI - “Tək-tək qəhrəmanlıq göstərməklə müharibə aparmaq olmaz”

Ekspert rəyi A- A A+

 

“Bəzi adamlar nümunə gətirirlər ki, Mübariz İbrahimov kimi qəhrəmanlıq göstərməlidirlər. Ancaq tək-tək gedib Mübariz İbrahimov kimi qəhrəmanlıq göstərmək, canından keçmək müharibə etmək deyil”.

Bunu Eurasia Diary-ə açıqlamasında hərbi ekspert, polkovnik Şair Ramaldanov Milli Məclisin deputatı Qüdrət Həsənquluyevin “Dövlət olaraq müharibə edə bilmiriksə, Mübariz İbrahimov kimi qəhrəmanlarımız şəxsi şücaət göstərməli, düşmənə qan uddurmalıdırlar” fikrinə münasibət bildirərkən deyib.

Onun sözlərinə görə, bu qəhrəmanlar mövcud vəziyyətin dözülməz olduğunu və bunu qəbul etmədiyi üçün bu yola əl atıblar:

“Onlar öz torpağı uğrunda düşmənin üstünə atılıb, Azərbaycan əsgərinin nə demək olduğunu, Azərbaycanın daxilində hansı hiss yaşayır, onu göstəriblər. Onlar bizim əsgərlərimizə, gənclərimizə, hərbiçilərimizə, mülki şəxslərimizə bir nümunə göstəriblər. Siz bilirsiniz ki, Mübariz İbrahimovdan sonra bizim gənclər nə qədər daxildən təmizləndilər, vətənpərvərlik ruhları daha da artdı. Mübariz İbrahimov bizim gənclər üçün bir nümunə oldu. Və əlbəttə, belə addımılar lazımdır, belə addımlar olub, var və olacaq da. Mübariz İbrahimovun davamçısı Milli Qəhrəman Çingiz Qurbanov oldu. Və bu onu göstərir ki, sabah döyüş başlasa, bizim daxili potensialımız, qəhrəmanlıq edəcək oğullarımız, canına qıyaraq özlərini vətən uğrunda düşmənin üzərinə ata biləcək əsgərlərimiz var. Ancaq bu gün müharibə mütəşəkkil şəkildə idarə olunur, döyüşlər idarə olunur. Yəni tək-tək orda-burda qəhrəmanlıq göstərməklə müharibəni aparmaq olmaz. Bizim əsas məqsədimiz ərazi bütövlüyümüzü bərpa etmək, işğalçi qüvvələri darmadağın etməkdir. Tək-tək belə nümunələrlə əlbəttə müharibə etmək olmaz”.

Ekspert bildirib ki, Silahlı Qüvvələr öz hazırlığını yüksək səviyyədə saxlayır.

“Lakin müharibə edib-etməmək də Silahlı Qüvvələrə bağlı deyil. Silahlı Qüvvələr sadəcə əmri yerinə yetirirlər və dövlətin siyasətini digər formada həyata keçirirlər. Hal-hazırda sülh yolu ilə bu məsələnin həlli axtarılır, əgər olmasa, dövlətin siyasəti ərazi bütövlüyümüzü bərpa etməkdən, işğalçıları ərazimizdən çıxarmaqdan ibarət olacaqdır. Əlbəttə bu zaman Silahlı Qüvvələr öz üzərinə düşən funksiyanı yerinə yetirəcəklər. Lakin Silahlı Qüvvələr dura-dura pərakəndə şəkildə gedib müharibə etmək olmaz. Ali Baş Komandan əmr verməlidir. Dövlət qoyulan məqsədlərə nail olmaq üçün addım atmalıdır.  Və Silahlı Qüvvələr sadəcə dövlətin əlində olan, sadə dildə desək, bir çomaqdır. Yəni o çomağı əlində işlətmək lazımdır. Ona görə Silahlı Qüvvələr daim öz vəzifə borcunu yerinə yetirmək üçün öz döyüş qabiliyyətini, döyüş potensialını qaldırırlar. Dövlət də döyüş potensialını və imkanlarını qaldırmaq üçün Silahlı Qüvvələri lazım olan silah, texnika və sursatla  təmin edir. Ona görə müharibə vermək əmri Silahlı Qüvvələrdə deyil,  Azərbaycanın Ali Baş Komandanının səlahiyyətindədir. Yenə də deyirəm, Silahlı Qüvvələrimiz Ali Baş Komandan, cənab Prezident İlham Əliyevin hər hansı bir əmrini yerinə yetirməyə hazırdır və bu gücə qadirdir”,- deyə Ş.Ramaldanov bildirib.

Polkovnik onu da qeyd edib ki, əgər  Ermənistanla sülh müqaviləsi yoxdursa, deməli  müharibə şəraitindəyik:  “Hər il Silahlı Qüvvələrə 3 milyarddan çox pul ayrılır. Silahlı Qüvvələrimiz öhdəsinə düşən vəzifəni yerinə yetirməsi üçün silah, texnika və hərbi sursatlar alınır. Bilirsiniz ki, biz daim genişmiqyaslı döyüş hazırlığı və təlimlər keçiririk. Ordu nümayəndələri, mütəxəssisləri  silahlardan vaxtaşırı proqram üzrə sınaq keçirilirlər və öz güclərini müxtəlif beynəlxalq hərbi yarışlarda yoxlayırlar. Hal-hazırda bilirsiniz ki, avqustun 1-dən Rusiyada hərbi mütəxəssislərin yarışları keçirilir. Və orda müxtəlif mütəxəssislər öz professionallığını göstərəcəklər. O cümlədən Azərbaycan da dəvət alıb. Mən demək istəyirəm ki,  müharibə aparmaq qarşıda qoyulan tapşırıqları güc, silah yolu ilə yerinə yetirməkdir. Bunun üçün də gündəlik fəaliyyət, döyüş hazırlığı keçirilir”.

Vəfa VƏLİYEVA 

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...