Ukraynalı siyasətçi Genadi Balaşov "Eurasia Diary" portalına açıqlamasında Ukrayna-Rusiya münasibətlərindəki son gərginliyi şərh edib.
Ötən həftənin sonu Krımla de-fakto sərhəd və Donbas bölgəsində yerləşən Ukrayna qüvvələri yüksək hazırlıq vəziyyətinə gətirilib. Bölgədə gərginlik Rusiyanın Ukraynanı Krıma müdaxilə cəhdində ittiham etməsindən sonra artıb. Belə ki, Rusiyanın təhlükəsizlik xidməti (FSB) Ukraynanın hərbi kəşfiyyat qurumunu Krıma müdaxilə cəhdində ittiham edib və Ukrayna tərəfinin atəşi nəticəsində iki Rusiya hərbçisinin həlak olduğunu bildirib.
Ukraynanın BMT-dəki nümayəndəsi isə Krım yarımadası ilə bitişik bölgədə 40 minlik Rusiya qoşununun olduğunu deyib.
“Qarnımızı “saxtakarlıqla” doydururlar”
Əslində, nəyin baş verdiyini, Minsk razılaşmasını həqiqətən hansı tərəfin pozduğunu biz bilmirik. Yəqin ki, həqiqəti heç vaxt da bilməyəcəyik. İctimaiyyətə daxil olan informasiya sırf hökümətlə razılaşdırılmış formada mətbuata sızan məhdud məlumatlardır. Bir sözlə, qarnımızı "saxtakarlıq"la doydururlar.
"Ukraynaya düşmən obrazında siyasi piar qurmaq sərfəli və rahatdır"
İndi məzuniyyətlər və sakitlik dövrüdür. Əslində, hakimiyyətin xalqa təqdim etmək üçün hər hansı fəaliyyəti olmadıqda, camaata yanlış müzakirə mövzuları təqdim edirlər. Həmçinin, sentyabrda Rusiyada Dövlət Dumasına seçkilər keçiriləcək. Yəni, Ukraynaya düşmən obrazında siyasi piar qurmaq çox sərfəli və rahatdır.
Mövzu ilə əlaqədar bax: Səngərdə münaqişə - Donbas
Donbas və Krım ətrafındakı gərginlik Ukrayna rəhbərliyinə də sərfəlidir. Aydındır ki, müharibə hədəsi siyasi ritorikada tez-tez istifadə olunur. Siyasətçilər özləri süni formada təhdidlər yaradırlar.Çünki, Rusiyayla münaqişə mövcud olduğu təqdirdə, hakimiyyətin islahatlar apardığına dair süni reklamı var.
“Rusiya iqtisadiyyatının əhəmiyyətli dərəcədə zəifləməsi o deməkdir ki, müharibələr olmayacaq”
Xoşbəxtlikdən, Ukrayna və Rusiya arasında real müharibə təhlükəsi yoxdur. Yəni, müharibə hər iki tərəfin "cibinə görə" deyil.
Rusiya Krımın ilhaqından sonra beynəlxalq sanksiyaların tətbiqi, neftin dünya bazarında qiymətinin azalması, rublun dollara nisbətən dəyərinin düşməsi nəticəsində trilyonlarla dollar itirdi. Rusiya iqtisadiyyatının əhəmiyyətli dərəcədə zəifləməsi o deməkdir ki, müharibələr olmayacaq.
"Putin ruslara qarşı "qorxu təhdidi"ni artıracaq"
Rusiya Ukrayna ilə münaqişənin, fantastik düşmənçiliyinin nəticələrini hələ çox hiss edəcək. Rusiya prezidenti Vladimir Putin ruslara qarçı müharibə təhdidini hələ çox əks etdirəcək. Sanksiyalar isə Rusiya iqtisadiyyatının əsas hissəsini amansızcasına yeyəcək.
Ukraynanın iqtisadiyyatı da öz növbəsində zəifləyir. Çünki, Ukraynanın ciddi xarici borcları var və müharibə kimi bədxərc hadisəyə qarşı qabiliyyətsizdir.
"Müharibə Rusiyaya və Ukrayna üçün sərfəlidir”
Hərbi münaqişə hər iki ölkə rəhbərliyinin qazancı üçün vasitəyə çevrilib. Bu baxımdan, Ukrayna və Rusiya rəhbərliyi üçün döyüş xəritəsinin genişlənməməsi şərtilə hibrid və gizli müharibənin davam etməsi sərfəlidir.
Qarşıda bizi iki qardaş xalqın növbəti toqquşmaları və döyüşləri gözləyir.
Genadi Balaşov: Ukraynanın "5.10" siyasi partiyasının lideri, ictimai xadim və bloqerdir
