Bu gecədən etibarən UEFA Çempionlar Liqasının 1/8 final mərhələsi çərçivəsində cavab görüşlərinə start veriləcək. 6 və 7 mart tarixlərində saat 23:45-də 4 qarşılaşma keçiriləcək.

Eurasia Diary xarici KİV-ə istinadən xəbər verir ki, gecəyə Santiaqo Bernabeuda baş tutacaq "Real Madrid"(Ispaniya) və "Ayaks" (Hollandiya), Siqnal İduna Parkda keçiriləcək "Borussiya Dortmund" (Almaniya) və "Tottenhem" (İngiltərə) görüşləri ilə başlanılacaq. 

İlk matçda qələbə qazanan İspaniya və İngiltərə təmsilçiləri cavab qarşılaşmasına üstün yollanacaqlar. Xüsusilə, Tottenhemin öz meydanında qazandığı 3-0 hesablı qələbə səfərə arxayın yollanmaq üçün zəmin yaradır. Bununla belə, Tottenhemin baş məşqçisi Maurisio Poçettino mətbuata açıqlamasında deyib-"Biz ilk oyunu unutmalıyıq". Dortmund klubunun baş məşqçisi Lusian Favr isə matç öncəsi fikirlərini belə ifadə edib:"Biz olduqca ağıllı oyun sərgiləməliyik". Alman klubunun heyətində Lukas Pişek və Kristian Pulişiç, İngilis klunundan isə Del Alli, Erik Dayer, Harri Vinks zədə səbəbilə oyunu buraxacaqlar. 

Real isə Hollandiyada qazandığı sürüşkən hesabı möhkəmləndirmək üçün evdə Hollandiyalıların müqavimətini qırmağa çalışacaq. İspanların heyətində Serxio Ramos cəzalı olduğu üçün oyunu buraxacaq, Hollandların heyətində isə Bande zədə səbəbilə uzun müddətli sıradan çıxıb. Real Madrid klubunun oyunçusu Luka Modriç rəqib haqqında bunları deyib:"Onlar çox istedadlı və iddialıdırlar". "Ayaks" klubunun baş məşqçisi Erik Ten Haq oyun haqqında fikirlərini mətbuata bildirib:"Biz Madrid klubunun həssas nöqtələrini gördük."

Xatırladaq ki, İspaniyada baş tutacaq oyunda baş hakim Almaniyalı Feliks Brix, Almaniyada baş tutacaq oyunda isə baş hakim holland Danni Makkeli olacaq.