Aşihara Karate Federasiyasının prezidenti Maarif Bağırov və digər üzvləri martın 20-dən 24-nə qədər Antalyada keçirilən Avrasiya çempionatında iştirak edən idmançılar və məşqçi heyəti ilə birlikdə BAMF-da mətbuat konfransı keçirib.
Eurasia Diary xəbər verir ki, tədbirin əvvəlində federasiyanın prezidenti Maarif Bağırov Aşihara karate növünün tarixi və idmançılar haqqında məlumat verib. Tədbirdə həmçinin, Aşihara Karate federasiyasının vitse-prezidenti Umud Mirzəyev və Vüsal Məmmədov, idmançı-müəllim Fərman Rəhimov çıxış etdilər. Yarışda iştirak edən idmançıların nəaliyyətlərini vurğulayan federasiya prezidenti və rəsmiləri bunu çempionatdan əvvəl məşqlərin uğurlu keçməsi ilə əlaqələndirib.
Qeyd edəki ki, yarışda 20 ölkədən 200 idmançı mübarizə aparırdı. Antalyadakı Avrasiya çempionatında Azərbaycanı təmsil edən 11 döyüşçünün hamısı medala layiq görülüb. 6 qızıl, 4 gümüş və 1 bürünc medal qazanan millinin heyətindən heç kim əliboş qayıtmayıb. Beləcə yığmamız komanda hesabında ilk sırada yer alib. 200 idmançı arasında Azərbaycanı təmsil edən, 24 yaşlı Aşihara karate növü üzrə üçqat dünya çempionu və 2 dəfə Avrasiya çempionu olan Musazadə Musa ardıcıl ikinci dəfə Avrasiya çempionatında "ən yaxşı texniki döyüşçü" adına layiq görülüb. Bundan başqa, yaşca ən kiçik Azərbaycanlı idmançı 7 yaşlı Əsgərov Məhəmməd 27kq çəki dərəcəsində çempion olaraq himnimizi səsləndirən idmançılar sırasına öz adını yazdırmağı bacarıb.
Daha sonra federasiyanın prezidenti Maarif Bağırov mətbuat nümayəndələrinin suallarını cavablandırıb. O, Aşihara karate növünün Avropada geniş yayıldığını bildirib. Federasiya prezidenti qeyd edib ki, yarışda bu idman növünün vətəni Yaponiya iştirak etmirdi. “Qalibiyyətimizin əsas səbəbi idmançılarımızın, federasiyamızın birliyi, məşqçilərimizin bizə diqqəti və qayğısıdır”, deyə Maarif Bağırov qeyd edib.
Sonra Avrasiya Çempionatından bəhs edən video nümayiş olunub.
Tədbirdə çıxış edən idmançılar yarışdakı nəticələri barədə mətbuata məlumat verdilər.
Tədbirin sonunda Federasiyanın prezidenti Maarif Bağırov, Aşihara Karate federasiyasının vitse-prezidenti Umud Mirzəyev və Vüsal Məmmədov çıxış ediblər.
Beynəlxalq Avrasiya Mətbuat Fondunun prezidenti Umud Mirzəyev bu fikirləri söyləyib: "Bu təkcə burada iştirak edən idmançıların deyil, bütün Azərbaycan xalqının, millətinin uğurudur".
Federasiyanın prezidenti Maarif Bağırov 2020 -ci il Dünya Çempionatına hazırlıqların başladığını deyib və qarşıdan gələn yarışlarda idmançılara uğurlar arzulayıb. Sonda xatirə şəkli çəkilib.
Qeyd edək ki, Aşihara karate növü üzrə növbəti dünya çempionatı 2020-ci ildə İtaliyada keçiriləcək.