“Qarabağ” Çempionlar Liqasının “yüzlüy”ündə yer alıb

İdman 13:15 08.07.2019

Oxunma sayı: 2634

Sabah start götürəcək Çempionlar Liqasının I təsnifat mərhələsi ərəfəsində Avropanın ən nüfuzlu klub turnirinin tarixinin ümumi cədvəli açıqlanıb.

Eurasia Diary-nin APA-ya istinadən məlumatına görə, siyahıda 1955-ci ildən cari mövsümün startına qədər turnirdə oynamış klublar yer alıb.

64 il ərzində yarışda ümumilikdə 513 komanda iştirak edib. Əvvəl Çempionlar kuboku, 1992-ci ildən Çempionlar Liqası adlanan turnirin ən yaxşısı İspaniya “Real”ıdır. Almaniya “Bavariya”sı ikinci, digər İspaniya klubu “Barselona” üçüncüdür.

Azərbaycanı Çempionlar Liqasında təmsil etmiş 7 klub da siyahıya daxil edilib. Ən yaxşı təmsilçimiz “Qarabağ”dır. Ağdam klubu 6-cı dəfə qatılacağı yarışın 100-cü komandasıdır. Keçirdiyi 30 qarşılaşmada 11 qələbə, 11 heç-heçə və 8 məğlubiyyət olan “Qarabağ” 29 qol vurub, 25-ni buraxıb.

6 dəfə turnirə qatılan “Neftçi” 167-ci pillədə qərarlaşıb. Paytaxt təmsilçiləri “Bakı” və “Keşlə” üçüncü, Qərb klubları “Şəmkir”lə “Kəpəz” dördüncü “yüzlük”dədir. Çempionlar Liqasında qələbə qazanmayan yeganə Azərbaycan klubu “Xəzər Lənkəran” isə beşinci “yüzlük”də yer alıb.

yer	klub	iştirak	O	Q	H	M	T/F	X
1	Real (İspaniya)	49	431	259	74	98	957-468	592
2	Bavariya (Almaniya)	35	341	195	72	74	681-342	462
3	Barselona (Ispaniya)	29	310	183	70	57	620-298	436
100	Qarabağ	5	30	11	11	8	29-25	33
167	Neftçi	6	18	5	5	8	14-32	15
265	Bakı	2	6	2	2	2	7-8	6
290	Keşlə	2	6	1	3	2	3-5	5
389	Şəmkir	2	6	1	0	5	6-11	2
390	Kəpəz	1	4	1	0	3	4-9	2
415	Xəzər Lənkəran	1	2	0	1	1	2-4	1

UEFA qrup mərhələlərinin ümumi cədvəlini də tərtib edib. 140 klubun daxil olduğu siyahıya “Real” başçılıq edir. “Barselona” ikinci, “Bavariya” üçüncü pillədə yer alıb. Azərbaycanın Çempionlar Liqasının qrupuna düşən yeganə təmsilçisi “Qarabağ” 129-cu pillədə qərarlaşıb.

yer	klub	iştirak	O	Q	H	M	T/F	X
1	Real (İspaniya)	23	259	156	49	54	551-281	361
2	Barselona (Ispaniya)	23	248	146	59	43	502-241	351
3	Bavariya (Almaniya)	22	241	142	53	56	457-253	317
129	Qarabağ	1	6	0	2	4	2-14	2

İndiyədək 33 ölkənin komandaları qrupda qüvvəsini sınayıb. Bu ölkələr arasında İspaniya 1-ci, İngiltərə 2-ci, İtaliya 3-cüdür. Azərbaycan isə 33-cü pillədə yer alıb.

yer	klub	iştirak	O	Q	H	M	T/F	X
1	İspaniya	87	877	452	216	209	1535-929	1120
2	İngiltərə	84	826	401	204	221	1371-878	1006
3	İtaliya	74	681	301	183	197	986-773	785
33	Azərbaycan	1	6	0	2	4	2-14	2