Argentina millisinin və "Barselona" klubunun kapitanı Lionel Messi karyerasının ən yaxşı anları barədə danışıb.
Eurasia Diary müsahibənin bəzi hissələrini təqdim edir:
- "Barselona" - "Bayer 04 Leverkuzen" (7-1) oyunu. İnanılmaz gecə idi! Mən öz qollarımın birini digərindən üstün tuta biləcəyimi düşünmürəm. Düzü, hücumların da birinin digərindən üstün olmasını düşünmürəm. Mən 5 qol vura bildiyim üçün, çox xoşbəxt idim. Ən əsası da komanda bu cür böyük qələbə qazana bilmişdi. Həmin an mən heç fərqinə belə varmamışdım ki, UEFA Çempionlar Liqası tarixində 1 oyuna 5 qol vuran ilk oyunçu olmuşdum. Mən sadəcə bizim komanda olaraq çox yaxşı oynadığımızı və mənim də buna görə xoşbəxt olduğumu düşünürdüm. Düzünü desəm, mən komandanın qələbəsini daha üstün tuturam. Bu, bir komanda oyunudur və mən də komanda olmadan nəsə edə bilməzdim".
- 2008 Olimpiya finalında Nigeriya - Argentina (0-1) oyunu. Həmin turnir bizim üçün inanılmaz bir turnir idi. Bəli, biz yarımfinalda qalib olmuşduq. 3-0, özü də çox yaxşı oynayan böyük Braziliya millisinə qarşı... Biz həmçinin Hollandiya səddini də keçmişdik. Həmin oyunların hər ikisi də çətin və ağır oyunlar idi.
- "Barselona" - "Sevilya" (5-1) oyunu. Tarixi ərzində çox böyük oyunçuların və dəfələrlə bu turniri qazanan xeyli gözəl oyunçuların oynadığı La Liga tarixində ən çox qol vuran oyunçu olaraq tarixə keçmək inanılmaz hissdir. Mənim üçün böyük qürurdur.
- Argentina - Bosniya (2-1) oyunu. Mən Dünya çempionatlarında ikinci qolumu vurmaq üçün, 8 il gözləməli olmuşdum. Biz gözəl bir turnir keçirmək istəmişdik və buna Bosniya üzərində qələbə ilə başladıq. Mən isə komandamızın ikinci qolunu vurmuşdum. Hər şey cəld baş tutdu. Yarımdairənin yaxınında topu ələ keçirdim və cərimə meydançasına tərəf irəliləməyə çalışdım. Gonzalo İquain ilə 1-2 ötürməsi etdik və ardınca, cərimə meydançası həndəvərindən zərbə endirdim. Bəxtimdən, qolla nəticələndi. Biz təsnifatda əla oynadıq və Braziliyadakı yerimizi bir neçə oyunla təmin etdik. Ardınca isə, finala çıxmaqla böyük bir komanda olduğumuzu göstərdik. Turniri sonda qazana bilməsək də, bacardığımız hər şeyi etdik.
- "Barselona" - "Bavariya" (3-0) oyunu. Mən Jerome Boatenq ilə təkbətək epizoda çatan kimi, sadəcə bütün düşüncəm onu aldadıb keçmək və qapı xəttinə mümkün qədər yaxınlaşmaq idi. Bunun digər oyunlardan, digər vaxtlarda olduğundan heç bir fərqi yox idi və mən topu aldım, qarşımda isə rəqib var idi. Mən bizi finala daşıyan bu cür vacib bir oyunda fərqlənə bildiyim üçün çox xoşbəxt idim. Amma, sadəcə sosial mediada bunun müzakirələrindən sonra, bizim necə gözəl oynadığımızı anladım. Mən bu barədə yazılan xeyli şərhləri oxudum və video görüntüləri izlədim. Bizim Luis Enrike kimi inanılmaz bir baş məşqçimiz var idi və o, bizə çox qəliz bir oyunda qalib olmağa xeyli kömək oldu. Biz həqiqətən də həmin oyuna köklənmişdik və bacardığımız ən yaxşı oyunu göstərməyə çalışdıq.