"Barselona"nın kapitanı Lionel Messi FIFA-nın saytına müsahibə verib.
Eurasia Diary müsahibədən seçmələri təqdim edir:
- İllər keçir. Fiziki vəziyyəti qorumaq daha da çətinləşir. Özünə hər zamankından daha çox qayğı göstərməli, daha yaxşı durumda olmaq üçün hər gün çox çalışmağın gərəkdir. Oyun günlərində özümü karyeramın lap əvvəllərindəki kimi hiss edirəm. Amma hər halda indi yaş öz sözünü deyir. Gərək daha çox özümə qayğı göstərim. Səfərlərimizlə, oyunlarımızla bağlı fiziki vəziyyətimdə çətinlik hiss edirəm.
Ötən mövsüm qəribə keçdi. Fantastik mövsüm keçirdik, lakin bir oyun hər şeyi (Çempionlar Liqasında "Liverpul"la 0-4 hesablı cavab oyununu nəzərdə tutur - red.) dəyişdi. Bu bizdə elə bir üzüntü yaratdı ki, qarşıdakı La Liqa oyunlarına əhəmiyyət vermədik. Kral Kuboku finalına yaxşı hazırlaşa bilmədik. Aldığımız nəticə bizə bax belə təsir etmişdi. Həmin bir oyun, mövsümdə özündən böyük bir iz buraxdı. Çempionlar Liqası finalına çox yaxın idik, amma sonda bu turnir bizə böyük təsir göstərdi.
- İnsanlar nəyə görə sizin Kriştiano ilə münasibətinizin bu dərəcədə yaxşı olmasına təəccüblənirlər?
- Bu illər ərzində aramızda olan böyük rəqabətə səbəb, birimizin "Barsa"da, digərimizin isə "Real Madrid"də çıxış etməsilə bağlı oldu. Həmçinin biz ayrı-ayrılıqda çoxlu mükafatlar əldə etdik. İnsanlar ola bilsin rəqabətin futboldan kənarda da davam etdiyini düşünür. Lakin bu belə deyil. Hər ikimiz komandamızın uğuru üçün çalışırıq və heç birimiz məğlubiyyət acısı yaşamağı xoşlamırıq. Bu bizim qəbul etmədiyimiz bir şeydir. Məhz buna görə aramızda belə bir rəqabət mövcuddur. Əsas olan isə, bu rəqabətin elə meydanda da qalmasıdır.
- Ansu Fatidən gözləntiləriniz?
- Onu çox bəyənirəm. Möhtəşəm oyunçudur. Karyerasında çoxlu uğur qazanması üçün böyük potensiala sahibdir. İstəyirəm ki, karyeramın əvvəlində mənə edilən yardım onun üçün də edilsin: Heç bir təzyiq edilməsin, hər şey müsbət qarşılansın. Siz bilməlisiniz ki, onun hələ 16 yaşı var. Ümid edirəm kənardan edilən təzyiqlər ona təsirsiz ötüşər və o, getdikcə dünyanın ən yaxşılarından biri olar.
- İndi başa düşürsünüz ki, Ronaldinyo o vaxtlar sizə necə davrandığını...
- Ronaldinyo və həmçinin o vaxtlar baş məşqçi olan Frank Raykard. Ümumiyyətlə isə mən bütün komandanı deyərdim. Hər kəs mənə yardım edirdi. Raykard məni ehtiyatda saxlayanda, buna çox üzülürdüm. İndi yaşım çoxdur və başa düşürəm ki, onun o vaxt etdikləri mənim xeyrimə işlədi. Mən ona hər zaman təşəkkür edəcəm. Onun mənə olan münasibəti çox vacib rol oynayırdı.
- Karyeranızı Argentinada bitirməyi düşünürsünüzmü?
- Bəli. Bunu hər zaman demişəm. "Newells Old Boys" forması geyinmək uşaqlıq arzumdur. Sadəcə bunu gerçəkləşdirə biləcəyəmmi?! Bunu dəqiq bilmirəm. Həm də bu tam olaraq məndən asılı olan bir şey deyil. Mənim üç uşağım var.
- Leo Messinin bu mövsüm hədəfləri nədir?
- Hər şey. 4 ildən sonra biz Çempionlar Liqasını yenidən qazanmaq istəyirik. Biz bilirik ki, hər gün daha çox çalışmasaq bunu əldə edə bilmərik. "Kopa Amerika"ya gəldikdə isə, bu turnirin başlamasını səbrsizliklə gözləyirəm.
Qeyd edək ki, Lionel Messi bir neçə gün öncə FİFA tərəfindən 6-cı dəfə "İlin ən yaxşı futbolçusu" seçilib.
