"İdmana 2011-ci məktəbdə oxuyanda gəlmişəm. Heç həvəsim yox idi, ağlımın ucundan belə keçirmirdim ki, idmanla məşğul olaram. İdmanı ali məktəbə qəbul olmaq üçün seçdim. İlk nailiyyətim də elə 2011-ci ildə olub. Moskvada Avropa çempionatı keçirilirdi, orada 3-cü yerə nail oldum. 2012-ci ildə dünya çempionatında 2-ci, 2013-cü ildə keçirilən dünya çempionatında isə 1-ci yeri qazandım. Taekvando idman növü çox çətindir, düzdür, kənardan baxan hər kəsə asan görünə bilər. Ən əsası da bizim kimi insanlara çətindir, çünki balansı bir yerdə stabil saxlamaq lazımdır. Bizdə bildiyiniz kimi yarı hissəmiz olmadığına görə müqaviməti saxlamaqda bir az çətinlik çəkirik. Məşqlərin özündə də çətinlik olur, zədələrimiz çox olur. Amma buna baxmayaraq var gücümüzlə çalışırıq".
Bunu Moderator.az-a açıqlamasında paralimpiyaçı Röyalə Fətəliyeva deyib. O daha sonra əlavə edib.
"Əkiz olduğuma görə sol qolum inkişafdan qalıb, dirsəkdən aşağı yoxdur. Amma buna da min şükür. Müəllimim, həm də baş məşqçim Fərid zarafatca deyir ki, dəmir kimi qızsan (gülür). Amma buna baxmayaraq fiziki əngəlli olmağıma mənə həyatda heç nəyə əngəl yaratmayıb. Bəlkə də mənim yerimdə kim olsaydı uğurun bir addımlığından geri qayıdardı. Əngəli heç vaxt əngəl saymamışam, fəth edəcəyim zirvələri, qazanacağım uğurları düşünmüşəm. Amma nə yalan deyim, səhhətimə görə əvvəl kompleksli idim, idmana gələndən sonra həyatım tam dəyişdi, xoşbəxtin xoşbəxti oldum. Bəzən öz-özümə deyirəm ki, nə yaxşı ki, bu cür dünyaya gəlmişəm. Bəzən mənə deyirlər ki, ikinci dəfə dünyaya gəlsəydin bu sənəti seçərdin?Bunu bilmirəm. Amma bu dünyaya ikinci dəfə yenə də əlil, fiziki əngəlli kimi gəlməyi seçərdim. Çünki mən belə xoşbəxrəm. Bu tək əlimlə hər şeyə nail olmuşam, inşallah bundan sonra da olacağam. Bir dəfə heç vaxt yadımdan çıxmaz, barmağım sınmışdı, amma buna baxmayaraq döyüşdüm. O qədər ağladım ki, bu halımla döyüşdüm, niyə uduzdum? Amma heç vaxt çətinliklərdən qaçmamışam. Çətinliklər mənə mane olmayıb, əgər mane olsaydı indi Tokioda keçirilən olimpiya oyununda iştirak edə bilməzdim" deyə Röyalə Fətəliyeva deyib.
Röyalə çətin döyüşlərindən də danışıb.
"2019-cı ildə dünya çempionatı idi. İlk rəqibim Mərakeşli idi, onunla döyüşüb, 14:1 uddum. 2-ci rəqibim Meksikalı qız idi. Amma öncədən bilmirdim ki, kimlə döyüşəcəm. Məşq yoldaşım dedi ki, Röyalə, qız pişik kimidir, o qalib gələcək. Amma rinqə çıxanda pişik kimi qızı ev pişiyi edərək 7:5 uddum. Amma həqiqətən də qız sürətli idi və reytinqdə də 4-cü yerdə gedirdi. Ümumi götürəndə mənim bütün döyüşlərim çətin olub, çünki rəqiblərim ilk 4-lükdə olanlar olub. Amma şükür Allaha yaxşı nəticələr əldə etmişəm" deyə o bildirib.
"Ümumiyyətlə olubmu ki, hansısa rəfiqənizə oğlan sataşsın, gedib döyəsiz, yaxud söhbət xırdalayasız?" sualına isə Röyalə Fətəliyeva belə cavab verib.
"Döymək yox əsla, amma oğlanın üstünə getmişəm. Mənim yanımda olan qıza hansısa oğlan söz deyə bilməz. Çox təəssüflə deyəcəyəm bizim insanlar mənim kimi fiziki məhdudiyyətli bir insan görən kimi başlayırlar qulaqlarını çəkməyə, nəsə söz pıçıldamağa. İnan səmimi deyirəm, gedib dalaşmışam, bunlar ən çox orta yaşlı xanımlar olub. Belə hallar metroda daha çox olub, 1-2 dəfə yola vermişəm, sonra demişəm ki, nə var?Yaxşı baxmadın qoluma, buyur bax. Qolumu açan kimi şoka düşürlər, üzr istəyib gedirlər" deyə o bildirib.
