Qətərdə davam edən Dünya Çemionatı müzakirələrə açıq, sensasiya dolu oyunlarla keçir. Almaniya, Belçika kimi favorit ölkələrin millilərinin qrupdan çıxa bilməməsi suallar doğurub. Bu turnirin axrasında totalizator ola bilərmi?
Ednews bu barədə tanınmış şəxslərin fikirlərini öyrənib. Cavabları təqdim edirik:
Mətbuat Şurasının sədri Rəşad Məcid:
“Dünya çempionatında belə hallar baş verir. Turnirdə sözünü demiş milli komandalar özlərinə arxayın olurlar. Zəif komandalarla rahat və arxayın oynayırlar. Amma bir çox zəif komandalarda da əzm, hikkə, qalib gəlmək ehtirası olur. Bu çempionatda da gördük ki, məsələn, Səudiyyə Ərəbistanın Argentina üzərində qələbəsini demək olar. Bu da təbii ki, əzmlə, mübarizə ilə əldə edilmiş qələbə idi. Məncə, heç bir halda bu turnirdə totolizatorun rolu ola bilməz. Məğlub olanlar iddiasıdı. Futbolda sensasiya totalizatorlar çıxmayanda da olurdu. Sensasiya olmasa, hamı qələbə qazanar ki!”
Əməkdar jurnalist Aydın Bağırov:
“Futbolda sensasiyalar, qeyri-adi nəticələr hər zaman olur. Azarkeş də bu məsələdə bəzən xırdalığa gedir, hansısa "gözəgörünməz qüvvə" axtarır, yaxud gətirib hər şeyi bukmeykerlərə bağlayır. Mən futbol və idmana totalizator təsirini inkar etmirəm. Amma müasir dövrdə belə şeylər böyük yarışlarda yox, adətən, gözdən uzaqda olan turnirlərdə (məsələn, ikinci-üçüncü liqalarda) baş verə bilər.
Dünya çempionatına gəlincə, burada fərqli qitələrdən 32 komanda oynayır. Əgər məsələn, Almaniya gözlənildiyinin əksinə olaraq qrupdan çıxa bilmirsə, bunun səbəbini totalizatorda yox, bu ölkənin milli komandasında 2014-cü il dünya çempionu olduqdan sonra baş verən enişdə axtarmaq lazımdır. Onlar nə "Avro-2016"da, nə “DÇ-2018”-də, nə də “DÇ-2022”-də uğur qazana bilib. Qətərdə almanlar uğursuzluqla üzləşibsə, bunun səbəbkarı daha yaxşı formada olan və onları məğlubiyyətə uğradan Yaponiya və ya bukmeyker şirkəti deyil. Özü də hansı totalizatordan söhbət gedə bilər ki, Almaniya millisinin oyunçuları öz klublarında hər ay milyonlar qazanırlar?
Dünya çempionatında 64 oyun olur. Təbii ki, 64 oyunun hamısı azarkeşin istədiyi kimi bitə bilməz. Dünya çempionatının gözəlliyi də elə budur: fərqlilik, sensasiyalı nəticələr”.
İdman telejurnalisti Ceyhun Rzayev:
“ Sensasiyaları totalizator şəbəkəsi ilə əlaqələndirmək istəmirəm. Bunu düşünmək belə insana ağır gəlir. Futbol gözəldir, təmizdir. Futbolu çirkaba bulaşdırmaq olmaz. Niyə sensasiyalar çox oldu? Artıq hamı müasir futbolun tendensiyaları ilə uyğunlaşır. Məsələn, 20 il əvvəl Yaponiya yığmasının tək-tük üzvü Avropanın aparıcı çempionatlarında oynayırdısa, bu gün demək olar əksəriyyəti. Və ya Mərakeş millisi. Bir neçə futbolçusu top-klublarda çıxış edir, qalanları da Fransa çempionatında. Bir sözlə, artıq zəif adlandırdığımız yığmalar da güclənib və getdikcə yığmalar arasında səviyyə fərqi nəzərəçarpan dərəcədə azalmaqdadır”.
İdman blogeri Elmar Rza:
“Dünya çempionatı səviyyəsində oyun alqı-satqısı ağlasığmazdır. Burada mübarizə aparan futbolçuların bir çoxu il ərzində milyonlarla dollar qazanır. Onların istənilən bukmeker kontoru ilə sövdələşməsi şəxsi karyerasının və nüfuzunun kökünə birdəfəlik balta vura bilər. Həmçinin dünya çempionatında uğur qazanmaq demək olar ki, bütün futbolçuların ən ümdə arzusudur. Yüksək ambisiya və eqo sahibi olan futbolçular üçün yığmada nəinki titul əldə etmək, eləcə də həmin milli formanı geyinmək bir növ şərəf məsələsidir.
Düşünürəm ki, mundialda ortabab komandaların nailiyyət əldə etməsi ortaya xarakter qoymaqla bağlıdır. Milli forma daha çox mübarizə aparmağa, qaçmağa, qələbə üçün əlindən gələni əsirgəməməyə sövq edir. Belə olanda uğur qazanmaq mümkünləşir”.
Oğuz Ayvaz