ABŞ Konqresi Nümayəndələr Palatasının üzvləri Devid Trot və Adam Şiff növbəti dəfə qondarma “erməni soyqırımı” ilə bağlı təşəbbüsü ilə çıxış ediblər. Tramp administrasiyasını 1915-ci il “soyqırım”ını tanımağa çağıran ermənipərəst konqresmenlər bununla bağlı Konqresə qətnamə layihəsini təqdim ediblər.
Musavat.com bununla bağlı erməni mediasına istinadən xəbər verir. Layihədə iddia olunur ki, guya 1915-1923-cü illərdə Osmanlı imperiyası “soyqırım”ı həyata keçirərkən paralel olaraq İraq və Suriyadakı dini azlıqlara da hücumlar edib. “Yüz il bundan əvvəl Osmanlı imperiyası qəddarcasına erməni xalqına qarşı məhvetmə, zorlama və köçürülməni həyata keçirməsi nəticəsində 20-ci əsrin ilk soyqırımı zamanı 1,5 milyon kişi, qadın və uşaq həyatını itirib”-ermənipərəst konqresmenlər iddia edib.
Qətnamə layihəsini müəllifləri bu gün Suriya və İraqda yüz minlərlə insanın məhv edilməsini xatırladaraq hesab ediblər ki, Konqresin saxta “erməni soyqırımı”nı tanıması daha da aktuallaşıb.
“Cənub-şərqi Miçiqandakı erməni əhalini təmsil etmək mənimçün böyük şərəfdir və mən onlar uğrunda Konqresdə mübarizəmi davam etdirəcəyəm”-ermənipərəst konqresmen Devid Trot deyib. Məlumatda deyilir ki, bu iki konqresmenin təşəbbüsünə digər bir neçə həmkarı da dəstək olub. Valadao, Bilirakis, Pallone və Şpeyer “erməni soyqırımı”nın tanınması təşəbbüsünə dəstək veribər.
Onsuz da ürəkaçan olmayan Türkiyə-ABŞ münasibətlərinin indiki durumunda ermənipərəst konqresmenlərin tarixin saxtalaşdırılması cəhdi göstərməsi şübhəsiz ki, iki ölkə arasındakı ziddiyyətləri dərinləşdirməyə hesablanıb. Təsadüfi deyil ki, Tramp seçkidə qalib gələndən dərhal sonra erməni lobbisi onun “soyqırımı” tanıyıb-tanımayacağına cavab axtarırdı.
Yeri gəlmişkən, A.Şiff həmin konqresmendir ki, bir müddət əvvəl Qarabağ məsələsinə görə Azərbaycana qarşı (?-C.T.) sanksiyalar tətbiqinə çağırmışdı.
