Şotlandiya Böyük Britaniyadan ayrılmaq üçün referendum keçirəcək
Böyük Britaniyanın Avropa İttifaqından çıxışına (Brexit) dair saziş avropalıların Böyük Britaniyada yaşamaq və ora səfər etmək hüququnu saxlamasa, Avropa Parlamenti bu sənədi donduracaq. “The Guardian” xəbər verir ki, bu barədə avrodeputatlar bildiriblər.
“Brexit” üzrə Aİ-nin Danışıqlar Qrupunun rəhbəri Mişel Barnye və parlament üzvləri martın 29-nun - Britaniya hökumətinin Aİ-ni tərk etmək niyyətini birliyə rəsmən elan etdiyi tarixin insanların sərbəst yerdəyişməsinə son qoyulacağı tarix olacağından çəkinir".
Qəzetin məlumatına görə, Avropa Parlamentinin mövqeyini aydınlaşdıran qətnamə aprelin 5-də səsə qoyulacaq. Bu qətnamə növbəti iki il ərzində Britaniyaya səfər edəcək avropalıların hüquqlarının məhdudlaşdırılmasının qarşısını almağa hesablanıb.
Qeyd edək ki, bu gün Böyük Britaniyanın baş naziri Tereza Mey iki il davam etməsi gözlənilən “Brexit” prosedurunu rəsmən başladıb. O, «Brexit»in işə salınmasına dair Avropa İttifaqına məktubu imzalayıb.
Xəbərdə deyilir ki, Tereza Mey çərşənbə günü Brüsselə «Brexit» prosedurunun başlanılması haqqında rəsmi məktub göndərəcək. Qeyd edək ki, Avropa İttifaqından çıxmaq qərarını britaniyalılar 2016-cı ilin iyun ayının 23-ü referendumda qəbul ediblər.
Digər tərəfdən, gündəmdə olan məsələlərdən biri də Şotlandiya hökumətinin yenidən müstəqillik referendumu keçirməsidir. Bununla bağlı Britaniyanın baş naziri Tereza Mey ilə Şotlandiyanın birinci naziri Nikola Sturgeonun görüşməsi gözlənilir. Şotlandiya parlamenti üzvlərinin əksəriyyəti yeni müstəqillik referendumunun keçirilməsi barədə qərarı dəstəkləyib. Qeyd edək ki, yeni referendum birinci nazir Nicola Sturgeon tərəfindən təklif edilib. Referendum 2018-ci ilin payızı və 2019-cu ilin baharında keçirilməlidir.
Şotlandiya Böyük Britaniyanın Avropa İttifaqından çıxmasına gətirən referendumun nəticələrindən narazıdır. Şotlandiya hökuməti “Brexit” prosesinin Birləşmiş Krallıq üçün çətin olacağını düşünür. Hökumət Şotlandiyada yenidən referendum keçirməklə müstəqil dövlət kimi Avropa İttifaqının tərkibində qalmaq niyyətindədir. Rəsmi London isə “Brexit” prosesinin başladığı bir ərəfədə yeni referendumun keçirilməsinin məqsədəuyğun olmadığını bildirib.
Baş verənləri şərh edən “Atlas” Araşdırmalar Mərkəzinin rəhbəri , politoloq Elxan Şahinoğlu Şotlandiyanın gec-tez Böyük Britaniyadan ayrılacağını bildirdi: “Şotlandiya daha öncə də referendum keçirmişdi və çox cüzi səslə Britaniyanın ərazi bütövlüyünə səs verənlər qələbə qazanmışdı. Ancaq hökumətdə Şotlandiyanın ayrılmasının tərəfdarı olanlar çoxluq təşkil edirlər. O zaman mən də hesab edirdim ki, Şotlandiya yenidən referendum keçirəcək. İndi əllərinə yaxşı bəhanə düşüb. Bu isə ondan ibarətdir ki, Böyük Britaniyanın əhalisi Avropa İttifaqından çıxmağa səs versə də, Şotlandiya əhalisi Avropa İttifaqında qalmağa səs verib. Ona görə də şotlandiyalıların hakimiyyətdə olan millətçi partiyasının əsas arqumenti bundan ibarətdir ki, siz Avropa İttifaqından çıxmaq istəyirsiniz, biz isə istəmirik. Ona görə də müstəqil olmaq üçün referendum keçiririk. Mən əminliklə deyə bilərəm ki, hətta Şotlandiya əhalisi bu dəfə də cüzi səslə Böyük Britaniyanın tərkibində qalsa, gələcəkdə yenə də referendum keçirəcək. Şotlandiya Böyük Britaniyadan ayrılmayana qədər bu referendum daima təkrarlanacaq. Bunun zəncirvari reaksiyası da ola bilər. Şotlandiya referendum yolu ilə müstəqillik qazansa, gələcəkdə eyni tələblə Uels və Şimali İrlandiya da çıxış edə bilər. Ancaq London bu prosesin qarşısını almağa çalışacaq”.
Böyük Britaniyanın Avropa İttifaqından çıxmasına gəlincə, Elxan Şahinoğlu qeyd etdi ki, bu istiqamətdə iki fikir mövcuddur: “Bir tərəf hesab edir ki, ”Brexit" Böyük Britaniyaya ciddi iqtisadi zərər vuracaq. Bu istiqamətdə müəyyən hesablamalar aparılıb. Böyük Britaniya Avropa proqramlarından ayrılır, Avropa ilə ticarət-iqtisadi əməkdaşlıqdan ziyanla çıxacaq. Ancaq bunun əksini düşünənlər də var. Onlar iddia edirlər ki, heç bir ziyan olmayacaq. Əksinə, biz daha sərbəst olacağıq, sərbəst ticarət apara biləcəyik, qadağalar, normalar ortadan qalxacaq. İki cür fikir və arqumentlər var. Bunun hansının doğru olduğunu heç kim indidən söyləyə bilməz. Biz bunu “Brexit”dən 5-6 il sonra söyləyə bilərik ki, Şotlandiyada ölkənin Avropa İttifaqından ayrılması iqtisadi baxımdan faydalı oldu, yoxsa ziyanlı. Siyasi zəmində bunun zərərli olduğunu artıq demək olar. Şotlandiyanın Böyük Britaniyadan ayrılmaq istəməsi elə “Brexit”in zərərli nəticələrindən biridir".
