Fransaya məxsus Sen-Bartelemi və Sen-Marten dənizaşırı ərazilərdə "Irma" qasırğası nəticəsində ölənlərin sayı 6 nəfərə çatıb.
APA-nın RİA Novosti agentliyinə istinadən verdiyi xəbərə görə, bundan əvvəl 2 nəfərin öldüyü, daha 2-nin isə yaralandığı bildirilirdi.
“İndiyədək 6 ölüm faktı qeydə alınıb”, deyə region rəsmisi Erik Mer bildirib. Onun sözlərinə görə, ölənlərin sayının artması istisna deyil.
Qasırğa nəticəsində Fransanın Karib dənizindəki dənizaşırı əraziləri elektrik enerjisiz qalıb. Sen-Marten prefekturasının bir hissəsi su altında qalıb, yaşayış məntəqələrinə xeyli ziyan dəyib.
Ən yüksək beşinci dərəcəyədək yüksəlmiş “İrma” qasırğası Texasda dağıntı və daşqınlara səbəb olan "Harvi"dən daha güclü hesab edilir. "İrma" son 10 ildə Atlantik okeanda yaranan ən güclü qasırğadır.
***
01:43
Karib dənizində, Fransaya məxsus Sen-Bartelemi və Sen-Martin dənizaşırı ərazilərdə "Irma" qasırğası nəticəsində 2 nəfər ölüb, daha 2 nəfər xəsarət alıb.
APA-nın “İnterfaks” agentliyinə istinadən verdiyi xəbərə görə, "İrma" son 10 ildə Atlantik okeanda yaranan ən güclü qasırğadır.
Ən yüksək – beşinci dərəcə gücü verilmiş “İrma” qasırğası Texasda dağıntı və daşqınlara səbəb olan "Harvi"dən daha güclü hesab edilir.
Eyni zamanda Atlantik okeanda “Xose” və Meksika körfəzində “Katya” tropik fırtınaları güclənərək qasırğaya çevriliblər.
