BMT Təhlükəsizlik Şurası (TŞ) ABŞ-ın tələbi ilə İranda davam edən etiraz aksiyalarını müzakirə etmək üçün toplanıb.
ABŞ-ın BMT TŞ-də daimi təmsilçisi Nikki Haley İran xalqının ölkə miqyasında 79-dan çox məntəqədə hökumətə qarşı çıxdığını söyləyib.
Təzyiq edən hökumətdən bezmiş cəsur insanların həyatlarını riskə ataraq, etiraz aksiyalarına qatıldığını deyən Haley dünyanın İran xalqının cəsarətini alqışlaması gərəkdiyini ifadə edib.
Haley bildirib ki, İran Suriyada Əsəd rejimini dəstəkləmək üçün ən azı 6 milyard dollar xərcləyib və bunu bilən xalq hökumətə etiraz edib:
“İran Yəməndə husilərə milyonlarla dollar və başqa ölkələrə atmaq üçün ballistik raketlər göndərib. İranda hər ailənin orta yaşayış səviyyəsi 10 il əvvəlkinə nisbətən 50% aşağı düşüb. Getdikcə kasıblaşan İran xalqı hökumətin qatillərə və diktatorlara yardım etməməsi üçün küçələrə çıxdı. Azadlıqları dəstəkləyən ölkələr İran xalqına dəstək verdi, amma bundan artığını da etməliyik”.
İnsan haqlarına diqqəti çəkərək, bu ölkə rejiminin internetə girişə qadağa qoyduğunu və xalqı susdurmağa çalışdığını söyləyən Haley deyib ki, ABŞ azadlıq, rifah və ölkələri üçün etibar axtarışı içində olan iranlıların yanındadır. ABŞ təmsilçisi deyib ki, ölkəsi bu mövzuda səssiz qalmayacaq.
Rusiyanın BMT-dəki daimi nümayəndəsi Vasiliy Nebenzya isə ABŞ-ın İrandakı etiraz aksiylarını TŞ-də müzakirə çıxarmasını tənqid edib.
ABŞ-ı saxta bəhanələrlə İranın daxili işlərinə qarışmaqla suçlayan Nebenzya, “bu gün bir daha ABŞ-ın BMT TŞ-dən sui-istifadə etdiyini şahidi oluruq”, deyib: “İmkan verin, İran öz problemləri ilə özü məşğul olsun. Əfqanıstan, Suriya, Livan, İraq, Yəmən, Şimali Afrikadakı problemlərə diqqət yetirmək yerinə TŞ-nin enerjisini boşuna xərcləyirik”.
Fransanın BMT-dəki damimi təmsilçisi François Delattre, İrandakı etirazların beynəlxalq sülh və təhlükəsizliyə təhdid olduğunu bildirib. O, xəbərdarlıq edib ki, bu ölkəyə yönəlmiş hər hansı müdaxilənin əks effekti ola bilər.