Almaniyanın kansleri Angela Merkel Aİ Şurasının sədri Donald Tusk və Avropa Komissiyası sədrinin müavini Frans Timmermans Türkiyənin Suriya ilə həmsərhəd Qazıantep şəhərinə səfər ediblər. “Anadolu”nun verdiyi xəbərə görə, Qazıantepdə nümayəndə heyətini Türkiyənin baş naziri Əhməd Davudoğlu, baş nazirinin müavinləri Yalçın Akdoğan və Mehmet Şimşək, DİN rəhbəri və digər rəsmi şəxslər qarşılayıb.
Məlumata görə, nümayəndə heyəti suriyalı qaçqınların Qazıantepdəki “Nizip-2” düşərgəsində olub. Merkel və Davudoğlu suriyalı uşaqlarla söhbət edib və düşərgədə yaradılan şəraitlə tanış olub. Daha sonra Almaniya kansleri və Aİ-nin rəhbərləri düşərgənin ərazisində ailə mərkəzinin açılışında iştirak ediblər. Nümayəndə heyətinin düşərgəyə səfəri mətbuat üçün qapalı rejimdə keçirilib.
Aİ Şurasının sədri Donald Tusk Qazıantepdə mətbuat konfransı zamanı bildirib ki, Aİ miqrasiya sazişinə əsasən, bu yay qaçqınlarla bağlı layihələr üçün Türkiyəyə 1 mlrd avro ayıracaq. "Biz Türkiyə üzərindən Aİ-yə gələn qanunsuz miqrantların sayının azaldığını müşahidə edirik. Bu ölkə qaçqınların qəbulu məsələsində bütün dünya üçün örnək olub”, - deyə Task Merkel, Timmermans və Davudoğlu ilə birgə mətbuat konfransında bildirib.
Qaçqınlar üçün düşərgə 2013-cü ildə açılıb. Burada 4818 suriyalı qaçqın məskunlaşıb. Türkiyədə ümumilikdə 3 milyona yaxın suriyalı qaçqın sığınacaq tapıb. Ölkədə 26 qaçqın düşərgəsi yaradılıb.
Qeyd edək ki, Angela Merkel Türkiyəyə bir günlük səfər edib. Səfər zamanı Aİ nümayəndə heyəti Əhməd Davudoğlu ilə Türkiyə-Aİ arasında bağlanmış miqrasiya sazişinin icrasını müzakirə edəcək.