Bu gün BMT Təhlükəsizlik Şurası 15 fələstinlinin öldürülməsi səbəbindən təcili toplantı keçirəcək.
Təcili toplantının çağırılması Küveytin tələbi əsasında baş tutur.
Küveytin BMT-dəki daimi nümayəndəsi Mansur Əl-Otaibi deyib ki, onun ölkəsi BMT Təhlükəsizlik Şurasının dərhal hərəkətə keçməsini istəyir:
“Şura təcavüz və güc tətbiqi hallarını qınamalı və dayandırmalıdır. İşğalçı İsraildən silahsız fələstinlilərə qarşı hücumlara son verilməsi tələb edilməlidir”.
İsveçin BMT-dəki daimi nümayəndəsi Karl Skauda Qəzzada baş verən hadisələrdən narahat olduqlarını deyib: “Qəzzada 15 nəfərin həyatını itirməsi dəhşətlidir. Bu, bizi ciddi narahat edir. Güc tətbiqi adekvat olmalıdır. İsrail hüquq-mühafizə orqanları güc tətbiq edərkən mərmilərdən istifadə edib”.
Rusiyanın BMT-dəki nümayəndəliyi də Qəzza hadisələrindən ciddi narahatçılıq keçirdiklərini deyib.
Qeyd edək ki, İsrail ordusu ötən gün HƏMAS-ın nəzarəti altında olan Qəzza zolağına aviazərbələri nəticəsində 15 fələstinli ölüb, 1000-dən çox adam yaralanıb.
