Konkret.az Qazaxıstan mediasına istinadla xəbər verir ki, daxili işlər naziri Yerlan Turqumbayev ölkədə erməni, qırğız və rus nömrələrlə sürülməsinə icazə verilən avtomobillərin müvəqqəti qeydiyyata alınması planlarından danışıb. Nazir deyib: “Ermənistan, Qırğızıstan və Rusiya qeydiyyatında olan maşınlarla bağlı bir çox şikayətlər var”. Yol hərəkəti qaydaları pozanlar arasında bu avtomobil sahiblərinin sayı daha çoxdur. Onun sözlərinə görə, belə hallara qarşı ciddi tədbirlər görülmür, çünki Qazaxıstanda bu nəqliyyat vasitələri qeydə alınmayıb. “Onlar sahibkarlıq fəaliyyəti ilə məşğul olurlar – sərnişin daşıyırlar, 10 gündən artıq müddət ərzində respublikamıza gətirilən bu cür maşınların məhdudlaşdırılması və məcburi müvəqqəti qeydiyyata alınmasını təklif edirik”.

Qeyd edək ki, Qazaxıstan ərazisində uzun müddət fəaliyyət göstərən Avrasiya İqtisadi Birliyinə üzv ölkələrdə qeydə alınmış nəqliyyat vasitələrinin məcburi müvəqqəti qeydiyyata alınması məsələsi hazırda bütün dövlət hakimiyyəti orqanları və ictimai birliklərlə müzakirə olunur. Bu halda, onun həyata keçirilməsi üçün “Yol hərəkəti haqqında” Qanuna əlavə və dəyişikliklər edilməlidir. Müsbət bir qərar çıxdıqda, bu məsələ Qazaxıstan Respublikası Parlamentinə qanunvericilik fəaliyyəti çərçivəsində təqdim olunacaq.