Ermənilər Azərbaycanın 28-ci ildir ki, işğal altında qalan Laçın rayonunun Mirik kəndində köhnə məktəbi təmir edir və yeni əlavə bina tikir.
Eurasia Diary "moderator.az"a istinadən xəbər verir ki, separatçı nəşrlərin yaydığı məlumata görə, binanı ATƏT-in Minsk Qrupunun həmsədri olan ABŞ-da yaradılmış və orada qeydiyyatdan keçən “Hayrenaser”(“Vətənpərvər”) təşkilatı təmir etdirib tikdirir.
Şirkətin təsisçiləri 2017-ci ildən işğal altındakı Laçın, Qubadlı, Zəngilan rayonları (qondarma “Kaşataq rayonu”) ərazisindəki haylara faktiki başçılıq edən Amerika vətəndaşı Stepan Sarkisyan və onun arvadı Nelli-Şuşi Martirosyandır.
Mirikdəki məktəb sözügedən rayonlar ərazisində bu təşkilatın tikdirdiyi sayca 7-ci məktəbdir. 1994-cü ildən ermənilərin məskunlaşdırılmağa başlandığı Mirik kəndində hazırda 50 erməni ailəsi, yaxud 170 nəfər yaşayır. 12 sinif otağı, direktor kabinəsi, müəllimlər otağı, kompüter otağı, hərbi hazırlıq kabinəsi və s. olan məktəb binasını sentyabrın 1-dək istifadəyə veriləcəyi gözlənilir.