Ukraynanın Avropa Şurası Parlament Assambleyasındakı (AŞPA) nümayəndə heyəti AŞPA-nın payız sessiyasında iştirakdan imtina edib.
Eurasia Diary-nin "apa"a istinadən verdiyi xəbərə görə, bu barədə Ukrayna Ali Radasının Xarici Siyasət və Parlamentlərarası Əməkdaşlıq Komitəsinin sədri Boqdan Yaremenko öz "Facebook" səhifəsində yazıb.
"AŞPA-nın öz prinsiplərini pozmasına etiraz etməyin bundan başqa yolu yoxdur. Bu təşkilatın prinsiplərini pozanlara cavab vermək üçün başqa yolu olmayan və maraqlarına ciddi hörmətsizliklə üzləşən Ukrayna öz nümayəndə heyətini növbəti AŞPA sessiyasına göndərməkdən imtina edir", - deyə Yaremenko bildirib.
Qeyd edək ki, bu ilin iyun ayında AŞPA üç illik fasilədən sonra Rusiya nümayəndə heyətinin qurumda tam səlahiyyətlərini təsdiq edən qətnaməni qəbul edib. Sözügedən qərar Ukrayna tərəfinin etirazına səbəb olub.
AŞPA-nın payız sessiyası gələn həftə keçiriləcək.
