Çinin Uxan şəhərində dekabr ayında aşkarlanan koronavirus, başda Avropa olmaqla, bütün ölkələri növbə ilə karantinə sürükləyir.
EDNews xəbər verir ki, bu barədə İtaliyanın baş nazir Giuseppe Conte məlumat verib.
Tələfatın 1016 nəfərə çatdığı İtaliyada baş nazir Giuseppe Conte koronavirus səbəbindən martın 12-dən ölkə miqyasında dövlət xidmətləri istisna olmaqla, bütün ticarət fəaliyyətinin dayandırıldığını açıqlayıb.
Fransada yeni növ koronavirusdan həyatını itirənlərin sayı 61-ə, virusa yoluxanların sayı isə 2 min 876 nəfərə çatıb.
Bazar ertəsindən etibarən bütün məktəblərin bağlanacağı bildirilir. Məktəbləri aprel ayının əvvəlinədək bağlanan ölkələr sırasına Belçika və Portuqaliya da əlavə olunub. Lüksemburq bu ayın sonunadək məktəblərin bağlı olacağını elan edib.
İngiltərədə 10 nəfər virusun qurbanına çevrilib, 590 nəfər isə epidemiyaya yoluxub. Yeni növ koronavirusun yayılmasının nəzarətdə saxlanılmasının mümkün olmadığı ölkədə, “virusu nəzarətdə saxlamaq” mərhələsindən “virusun yayılmasının ləngidilməsi” mərhələsinə keçilib.
Baş nazir Boris Conson virusa yoluxanların sayının durmadan artacağını və ölkənin ən acınacaqlı ictimai sağlamlıq böhranlarından birini yaşadığını vurğulayıb.
Baş nazir, xəstəliyin ən xırda əlamətləri belə aşkarlanan şəxslərin azı 7 gün özlərini ətrafdan təcrid etmələrini və ailə üzvlərindən birində simptomlar aşkarlanarsa, digər ailə üzvlərinin də evdən çıxmamasını tövsiyə edib.
Ölənlərin sayının 39-a çatdığı ABŞ-da təsdiqlənən yeni növ koronavirus faktı min 504-ə çıxıb. Ölkə üzrə koronavirus 50 ştatdan 46-na yayılıb.
Koronavirusla bağlı mübarizə tədbirlərini gücləndirən Amerikada Ağ Ev, Konqres və Müdafiə Nazirliyinin (Pentaqon) binaları ziyarətçilər üçün bağlanıb.
77 nəfərdə Kovid-19 virusunun aşkarlandığı Kanadada karantində saxlanılan baş nazir Castin Tryudonun həyat yoldaşı Sophiedə virus testi müsbət çıxıb.
Almaniyada koronavirusdan ölənlərin sayı isə 6, daşıyıcıların sayı 2 min 369 olub.
İndiyədək bir nəfərin öldüyü Bolqarıstanda dünən aşkarlanan 9 xəstə ilə epidemiyadan əziyyət çəkənlərin sayı 15 nəfərə çatıb. Onlarla əlaqəsi olan 200-dən artıq şəxs isə axtarışdadır.
Çexiyanın baş naziri Adrej Babis, virusun yayılmasının qarşısını almaq məqsədilə əlavə tədbirlərin həyata keçirilməsi üçün fövqəladə vəziyyət elan etdiklərini bildirib.
Almaniya və Avstriyadan Çexiyaya əcnəbilərin girişinə məhdudiyyət qoyulacağını deyən Babis növbəti elanadək viza proseslərinin təxirə salındığını, xaricdə olan çexlərin isə ölkəyə girərkən iki həftəkarantində saxlanacaqlarını açıqlayıb.