“Əlbəttə, Azərbaycanın yararlanmayacağı “koronavirus” fürsətindən Ermənistanın yararlanması mümkündür...”
Ermənistandakı “Median Defender” təşəbbüsünün rəhbəri, politoloq Aqasi Yenokyan öz “Facebook” səhifəsində Qarabağdakı qanunsuz “seçki”lər və baş verən son olaylar barədə şərh yazıb.
EdNews xəbər verir ki, bu haqda işğalçı ölkə mediası məlumat yayıb.
"Qarabağdakı seçkilər zamanı Ermənistandan işgüzar ezamiyyətə göndərilən emissarlar daha pis bir iş gördülər. O qədər qanun pozuntularına rast gələ bilmədilər ki, seçkilər şübhə altına alınsın. Ancaq qeydə alınan pozuntular bəzi qüvvələrin Qarabağda iğtişaş törətməsi üçün kifayət etdi. Buna ikinci tura gedən namizəd Masis Mailyanın çox mübahisəli bir bəyanatı da dəstək verdi - vəziyyəti düzəltmək əvəzinə, daha da gərginləşdirdi” –deyə erməni siyasətşünas yazır.
Daha sonra A.Yenokyan proseslərin hətta Xankəndidəki idarəçiliyin birbaşa Ermənistan baş naziri tərəfindən ələ keçirilməsi ilə nəticələnə biləcəyini də proqnozlaşdırır.
“Hadisələrin belə bir təhlükəli inkişafı halında vəziyyətin Qarabağdakı hazırkı hakimiyyətin nəzarəti altından çıxması və “Qarabağ - Ermənistandır və nöqtə” şüarını həyata keçirən Nikol Paşinyanın oradakı idarəçiliyi birbaşa ələ keçirməsi mümkündür. Bundan sonra Nikolun Qarabağ məsələsindəki qərarının icrası sadə bir texniki problemə çevrilir. Əslində, mövcud böhran vəziyyətində belə, Nikol Paşinyan Qarabağa qarşı hiyləgər planını davam etdirir...”
Qeyd: Azərbaycan öz hüquqi torpaqlarındakı proseslərə birbaşa siyasi-hərbi yolla müdaxilə etməyincə Qarabağda hər şey baş verə bilər. Eləcə də bizim yararlana bilməyəcəyimiz “koronavirus” fürsətindən Paşinyan yararlana bilər. Əlbəttə, əgər Ermənistandakı gərginlikdən başı açılsa... Amma onu da unutmayaq ki, Paşinyana “Amerikanın adamı” kimi yanaşan Rusiyanın da başı özünə qarışmış kimi görünür...(moderator.az)