Koronavirus pandemiyasının yayılmasının qarşısını almaq üçün Özbəkistanda xüsusi tədbirlər görülüb.
Bunu "EDNews"un Özbəkistandakı müxbiri, tarixçi publisist Şöhrət Barlas bildirib.
Onun sözlərinə görə, burada insanların çölə çıxmasına məhdudiyyət qoyulub. Kafe və restoranlar bağlanıb, ancaq bazarlar açıqdır. Məktəblər, universitetlər öz fəaliyyətlərini dayandırıb.
Tənha yaşayan yaşlı insanlara kömək məqsədilə xüsusi proqramlar həyata keçirilir. Proqrama əsasən gənc könüllülər yaşlılara yeməklər gətirərək onlara kömək edirlər.
Videoda müxbirimiz insanlar və avtomobillərdən demək olar ki, təmamilə boşalmış əsas küçəni görüntüləyir: "Əgər kimsə avtomobil sürmək istəsə, xüsusi icazə almalıdır. İcazəsiz maşın sürməyə görə böyük cərimə tətbiq olunur. Hərəkət məhdudlaşdırılıb. Bunun yaxşı tərəfi də var. Hava çox təmizdir. İndi səmada daha çox ulduz görə bilərik. Təmiz hava ilə nəfəs alırıq", Barlas deyib.
O paytaxtdakı vəziyyətdən razıdır və hesab edir ki, ölkədə həkimlərin, hərbçilərin və polisin gördüyü işlərlə bağlı panika yoxdur.