Amerikalı müğənni Madonna Londonda irqçilik əleyhinə təşkil olunmuş yürüşə qoltuqağaclarında gəlib.
EDNews.net xəbər verir ki, dünya şöhrətli müğənni bu yaxınlarda “Madame X” adlı turu zamanı xəsarət alıb. Buna baxmayaraq, o yürüşə çıxaraq etirazçılara qoşulub. Müğənninin mühafizəçiləri gözə dəymədiyi üçün yürüş zamanı pərəstişkarları onunla şəkil, video çəkdirmək imkanını əldən verməyiblər. Sosial şəbəkələrdə yayılan şəkillərdə Madonnanın virus əleyhinə maska taxmadığı da diqqətdən yayınmayıb. Məsələ burasındadır ki, müğənni artıq COVİD-19-a tutulub və sağalıb. İndi onun orqanizmində immun sistemin ifraz etdiyi virusu neytrallaşdıracaq anticisimlər mövcuddur.
ABŞ-da baş verən hadisələrin fonunda Böyük Britaniyada təşkil olunmuş aksiyaya minlərlə etirazçı qoşulub. Onları idarə etmək üçün atlı qoşunlardan istifadə olunub. Toqquşmalar nəticəsində 23 polis xəsarət alıb. Avropada mitinqlər, həmçinin Parisdə və Berlində də keçirilib.
