Ümumdünya Qida Günü 16 oktyabr 1945-ci ildə təsis edilmişdir və bu gün həmçinin BMT-nin Ərzaq və Kənd Təsərrrüfatı Təşkilatının (FAO) yaranması günü kimi də qeyd olunur.
Bu il FAO daha qlobal bir məsələni diqqətə çatdırmaq üçün “Ümumdünya Qida Günü”nün şüarını “Birlikdə Böyütmək, Bəsləmək, Əməllərimiz gələcəyimizdir” olaraq təyin edib.
Bu günədək kənd təsərrüfatı sahələrinin məhsuldarlığı və ərzaq sistemlərində böyük yol qət edilmişdir. Lakin, hələ də çox sayda insanın yardıma ehtiyacı var. Hazırda dünyada 2 milyarddan çox insanın kifayət qədər təhlükəsiz və sağlam qidaya çıxışı yoxdur.
Bu il FAO üçün dünyada aclığa son qoyulması dayanıqlı inkişaf məqsədi və hər kəsin sağlam qidaya çıxışını təmin edilməsi istiqamətində xüsusi bir il olduğunu vurğulaya bilərik. Qeyd etmək lazımdır ki, COVID-19 pandemiyası bir çox çətinliklər yaratsada FAO-nun yerli hökümətlərlə sıx əməkdaşlığı sayəsində bu risklərin və çatışmazlıqların aradan qaldırılması istiqamətində bir çox işlər görülüb.
Bu günlə əlaqədar olaraq Kənd Təsərrüfatı Nazirliyi və FAO-nun təşkilatçılığı ilə onlayn tədbir və panel çıxışları baş tutub. Tədbirin açılış hissəsində Azərbaycan Respublikası Kənd Təsərrüfatı Nazirliyinin Nazir müavini İlhamə Qədimova, BMT-nin rezident əlaqələndiricisi Qulam M. İshaqzai və BMT-nin Ərzaq və Kənd Təsərrüfatı Təşkilatının Azərbaycandakı Tərəfdaşlıq və Əlaqələndirmə Ofisinin rəhbəri - Mələk Çakmak çıxış ediblər.
Tədbirdə çıxış edən İlhamə Qədimova – “Bu gün dayanıqlı inkişaf məqsədlərindən olan “Aclığa son” ərzaq təhlükəsizliyi və dayanıqlı kənd təsərrüfatını təmin etmək istiqamətində hökumət beynəlxalq təşkilatlarla, xüsusilə FAO ilə sıx əməkdaşlı edir. Müstəqillik əldə edildikdən sonra ölkədə yoxsulluq səviyyəsinin aşağı salınması üçün bir sıra tədbirlər görülmüş və nəticədə ölkəmizdə yoxsulluq səviyyəsi 5 faizədək azalmışdır.” – çıxışında bildirmişdir.
Bu il Ümumdünya Qida Günü dünyanın aqrar qida sistemlərinin kövrəkliyini üzə çıxaran COVID-19 pandemiyasına qarşı mübarizəni davam etdirdiyimiz zamanda baş tutur –deyə Qulam M. İshaqzai öz nitqində bildirib. Daha sonra çıxış edən Mələk Çakmak pandemiya dövründə bölgələrdə FAO Azərbaycan Tərəfdaşlıq və Əlaqələndirmə ofisinin ərzaq təhlükəsizliyi və fermerlərin ehtiyaclarının qarşılanmasında hökumətlə əməkdaşlıq şəraitində görülən işlər barədə məlumat verib və Ümumdünya Qida Günü və FAO-nun 75 illiyinin qeyd edilməsinə dair fikirlərini qonaqlarla bölüşüb.
Tədbir daha sonra panel üzvlərinin çıxışları və ümumi müzakirələr istiqaməti üzrə davam edib.
