“Əl-Cəzirə” televiziya kanalının jurnalisti Mahmud Hüseyn 4 illik həbsdən sonra azadlığa buraxılıb.
Eurasia Dairy xəbər verir ki, Mahmud Hüseyn 2016-cı ildə heç bir məhkəmə qərarı olmadan Misir hökuməti tərəfindən həbs edilib.
Kanalın baş direktoru vəzifəsini icra edən Mustafa Suaq Hüseynin azadlığa buraxılmasını "həqiqət anı və mətbuat azadlığında stimul verici mərhələ" kimi adlandırıb.
Qeyd edək ki, təcrübəli jurnalist Mahmud Hüseyn “Əl-Cəzirə” kanalında 2010-cu ildən fəaliyyətə başlayıb. Dohada yaşayan və çalışan 54 yaşlı jurnalist 2016-cı il 23 dekabr tarixində məzuniyyətini keçirmək üçün Qahirə şəhərinə gedib. Şəhərə çatan kimi Misir hökuməti tərəfindən heç bir ittiham irəli sürülmədən saxlanılıb. Daha sonra jurnalist vəkilinin iştirakı olmadan 15 saat sorğu-sual edilib.
Üstündən bir müddət keçəndən sonra Misir Daxili İşlər Nazirliyi Mahmud Hüseynin xarici qurumlardan pul alaraq yalan xəbərlər yaymaqda ittiham olunduğunu açıqlayıb. Bundan əlavə, Misir hökuməti onun həbs müddətini dəfələrlə artırıb ki, bu da qanunlara zidd hesab olunur.
Jurnalistin azad edilməsi üçün bütün dünyada etiraz və çağırış kampaniyaları keçirilib. Bir çox beynəlxalq jurnalist təşkilatları, hüquq müdafiə orqanları, tanınmış şəxslər Mahmud Hüseynin azadlığı tələbi ilə çıxış ediblər.
Belə qurumlardan biri də Umud Mirzəyevin başçılıq etdiyi Beynəlxalq Avrasiya Mətbuat Fondudur (BAMF). Hər zaman mətbuat azadlığı və jurnalistlərin təhlükəsizliyini müdafiə edən BAMF Mahmud Hüseyn barəsində bir sıra məqalələrin dərc olunmasında iştirak edib. Belə ki, BAMF-nin nəzdində fəaliyyət göstərən Eurasia Diary Analitik İnformasiya Portalı onun həbsi günündən etibarən silsilə informativ məqalələr verib.
Eləcə də, BAMF 2020-ci il dekabrın 23-də Mahmud Hüseynin azad edilməsinə çağıran bəyanat yayıb. Bəyanatda “Əl-Cəzirə”nin jurnalistinin həbsi qınanıb və bu, beynəlxalq hüquqa zidd addım hesab edilib.
Qeyd edək ki, vaxtilə Hüseynin azadlığa buraxılması üçün beynəlxalq imzatoplama kampaniyası keçirilib. Bu aksiyaya qoşulan və imzasını atanlardan biri də BAMF prezidenti Umud Mirzəyev olub.
Beynəlxalq ictimaiyyətin dirənişi sonda öz bəhrəsini verib. Bu gün Mahmud Hüseyn azadlığını əldə edərək öz ailəsinə qovuşub.