Ermənistan ordusunun Baş Qərargahı Baş nazir Nikol Paşinyanın istefasını tələb edib.
Eurasia Diary Sputnik Ermənistana istinadla xəbər verir ki, Baş Qərargah rəisi Onik Qasparyan, onun bütün müavinləri, bütün ordu birləşmələrinin və idarələrin komandirləri tərəfindən imzalanan bəyanatda Baş Qərargah "uzağı görməyən və əsassız addımlara, o cümlədən Baş Qərargah rəisinin birinci müavininin istefasına" etiraz edib.
Hərbçilər hesab edirlər ki, Tiran Xaçatryanın istefası barədə qərar ancaq şəxsi ambisiyalara əsaslanaraq, dövlət və milli maraqlar nəzərə alınmadan qəbul edilib. Onlar indiki ağır vəziyyətdə bu qərarı dövlət əleyhinə olan məsuliyyətsiz addım kimi dəyərləndiriblər.
Bəyanatda o da qeyd olunur ki, bu cür vacib və böhranlı vəziyyətdə Baş nazir və hökumət adekvat qərar vermək iqtidarında deyil.
“Silahlı Qüvvələr uzun müddət hazırkı hakimiyyətin orduya qarşı hücumlarına dözümlü şəkildə yanaşıb, ancaq hər şeyin həddi var. Silahlı qüvvələr şərəflə öz işini yerinə yetirib və xalqla birgə düşmənə qarşı döyüşüb. Amma hazırkı hakimiyyətin qeyri-effektiv idarəçiliyi və ciddi səhvlər ölkəni uçuruma gətirib çıxarıb” – bəyanatda bildirilir.