"Levon Ter-Petrosyanın seçkilərdə iştirakı Paşinyanın tərəfdarlarını böləcək" - Tofiq Zülfüqarov | Eurasia Diary - ednews.net

6 May, Cümə axşamı


"Levon Ter-Petrosyanın seçkilərdə iştirakı Paşinyanın tərəfdarlarını böləcək" - Tofiq Zülfüqarov

Dünya A- A A+

Ermənistanın Baş naziri Nikol Paşinyan növbədənkənar seçkilər elan edəndən sonra bir çox keçmiş siyasətçi öz şansını sınamağa qərar verib. Rusiyaya meyli və Türkiyəyə nifrəti ilə tanınan Robert Koçaryanın qayıdışının ardından, əks qanadın nümayəndəsi, Ermənistanın birinci prezidenti Levon Ter-Petrosyan da seçkilərdə iştirak edəcəyini bildirib.

Ermənistan Milli Konqresi Partiyasının rəhbəri Levon Ter-Petrosyan mayın 1-də qurultay çağıraraq partiyanın seçkilərdə iştirakı və başqa sualların cavabını açıqlayacaq. Onun addımı Ermənistan siyasi səhnəsində ciddi səs-küyə səbəb olub.

Qeyd edək ki, Nikol Paşinyan vaxtı ilə Levon Ter-Petrosyanın dəstkəçilərindən biri olub. İndi isə Ter-Petrosyan seçkilərdə iştirak etməklə ya müxalifətə qarşı Paşinyan lehinə balans yaradacaq, ya da baş nazirin elektoratını böləcək.

Eurasia Diary Levon Ter-Petrosyanın açıqlaması ilə bağlı Azərbaycanın keçmiş xarici işlər naziri və politoloq Tofiq Zülfüqarovun fikirlərini alıb.

Politoloq Ter-Petrosyanın qərarının Rusiyayönlü siyasətçilərin qayıdışını balanslaşdıran addım olduğunu söyləyib. O, bunu Ter-Petrosyanla Nikol Paşinyanın mövqeyi arasında olan yaxınlıqla izah edib.

 “Sonuncu sorğularda Paşinyanın dəstəyi təxminən 20 faiz ətrafında hesablanıb, radikal qanad olan “Sasna Tser”in dəstəyi isə 23-24%-dir. Levon Ter-Petrosyanın seçkilərə qoşulması Qərbyönlü düşərgəni gücləndirəcək. Onun mövqeyinə gəldikdə, Ter-Petrosyan daha çox Qərbyönlü siyasətçi kimi tanınır. Lakin eyni zamanda o, hakimiyyətdə olduğu dövrlərdə Rusiya ilə də çox yaxşı dil tapa bilmişdi. Nəzərə alaq ki, işğalların çoxu onun zamanında baş verib. “Miatsum” adlanan layihənin əsas oyunçularından biri olub. Bu baxımdan, onun Qərbyönlü mövqeyinə bu qədər də aldanmayaq. Bildiyiniz kimi, Ter-Petrosyan Suriyadan gələn ermənidir, onun ailəsi ümumiyyətlə Suriyanın Kommunist Partiyasına yaxın idi. Ter-Petrosyan yaşına görə də fəal olmayacaq, onun xəstəliyinin olduğunu da bildirmişdilər. Ermənistanın qarşısında əsas sual onların Qərbyönlü yoxsa əvvəlki kimi Rusiya mərkəzli olacağıdır”, deyə keçmiş diplomat bildirib.

Ermənistanda Qərblə əlaqələri dəstəkləyən əhalinin qarşısında artıq iki seçim yaranıb: Paşinyan və ya Ter-Petrosyan. Politoloq bu vəziyyətin elektoratı böləcəyi ehtimalının yüksək olduğunu hesab edir: “Amma Ter-Petrosyanın Paşinyana nisbətən neqativ elementləri azdır. Neqativ element dedikdə isə Paşinyanın müharibədə məğlubiyyəti, Qarabağı itirməsi və ona qarşı digər ittihamlar aiddir. Paşinyana qarşı bu elementlər onun dəstəyinin azalmasına gətirib çıxarıb. Azalmış hissəyə yeni seçim üçün bir siyasətçini də əlavə etsək, bu, onların bölünməsinə gətirib çıxarda bilər”.

2008-ci ildə prezident seçkilərində Serj Sarkisyanın əsas rəqibi Levon Ter-Petrosyan olub. Onun yanında əsas dəstəkçisi isə gənc Nikol idi. Həmin dövrlərdə yan-yana eyni mövqedə qərar tutan iki siyasətçinin indiki məqamda əks cinahlarda yer tutması da digər bir sualdır.

“Mən onların ziddiyyətləri çox olmasını istisna etmirəm. Qərbyönlü elektorat Paşinyanı Rusiya ilə əlaqələri kəsməməkdə və Rusiyanın orbitindən çıxmaq üçün lazımı iradə göstərməməkdə ittiham edib. Ancaq burada ziddiyyətli məqamların ola bilməsini hesab edirəm. Burada ən maraqlı sual Qərbin kimə dəstək verəcəyidir. Onların hər ikisinin Qərbin dəstəyini almaq istədikləri bəllidir. İkincisi də, onların məqsədləri Rusiya ilə də dil tapmaqdır ki, Moskva mane olmasın. Paşinyanın Moskvaya səfər etməsi və Rusiya ilə digər təmasları göstərir ki, Ermənistanın baş naziri Kremlə lazım gələndə onunla da işləməyin mümkün olduğunu bildirməyə çalışır. Ter-Petrosyanda isə vəziyyət fərqlidir. Son dövrlərdə o, özünü qəti Qərbpərəst kimi göstərib. Bu baxımdan mövqelərində nisbi fərq olsa da, onlar eyni elektoratı öz aralarında böləcəklər”, deyə Tofiq Zülfüqarov söyləyib.

Ülvi Əhmədli

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...