Rusiya Xarici İşlər Nazirliyi (XİN) Suriyadakı prezident seçkilərini ölkənin suveren işi və daxili sabitliyi möhkəmləndirmək üçün atılan mühüm addım kimi qiymətləndirir.

Yerli KİV-ə istinadən bildirir ki, Rusiya XİN-in yaydığı açıqlamada belə deyilir.

Qeyd olunub ki, hazırkı Prezident Bəşər Əsəd seçkidə böyük qələbə qazanıb.

“Suriyada növbəti prezident seçkiləri 26 mayda keçirilib. Seçkilərin nəticələrinə əsasən, hazırkı dövlət başçısı Bəşər Əsəd səsvermədə iştirak edən seçicilərin 95,1% -nin dəstəyini alaraq böyük qələbə qazanıb", - XİN-in məlumatında vurğulanıb.

Daha əvvəl xəbər verdiyimiz kimi, Əsədin rəqibləri - müxalifət təmsilçisi Mahmud Marayi və keçmiş dövlət naziri, Suriya parlamentinin üzvü Abdullah Abdullah sıralama ilə 3,3 və 1,5 faiz səs alıblar.

XİN-in məlumatında daha sonra deyilir: “Suriya qanunvericiliyi əsasında dövlət qurumlarının normal fəaliyyət göstərməsini təmin etmək, xüsusilə terrorçulara qarşı davam edən silahlı mübarizə kontekstində bütün suriyalıların mənafeyinə uyğundur. Bu çərçivədə Xarici İşlər Nazirliyi bəzi Qərb paytaxtlarından seçkilər keçirilməzdən əvvəl onun qanunsuz olduğu barədə verilən açıqlamaları Dəməşqə qarşı kobud siyasi təzyiq elementi və Suriyanın daxili işlərinə müdaxilə cəhdi kimi qiymətləndirir. Heç kimin suriyalılara dövlət başçılarını nə vaxt və hansı şərtlərlə seçməli olduqlarını diktə etmək hüququ yoxdur".

Xatırladaq ki, rəsmi məlumatlara əsasən, seçkilərdə ümumilikdə 14,2 milyon suriyalı, yəni 78,64 faiz seçici iştirak edib.