ATƏT-in Demokratik Təsisatlar və İnsan Haqları Bürosu (DTİHB) Rusiyada sentyabrın 19-da keçirilən parlament seçkilərinə müşahidəçi göndərməkdən imtina edib.
EDNews.net Virtualaz.org-a istinadən xəbər verir ki, təşkilat bunu Rusiya tərəfinin müşahidəçilərin sayı ilə bağlı sərt məhdudiyyətlər tətbiq etməsi ilə əsaslandırıb. Son 30 ildə ilk dəfədir ki, ATƏT Rusiya seçkilərini izləməkdən imtina edir.
“Rusiyada qarşıda gələn seçkiləri müşahidə etməyimizin mümkün olmayacağından çox təəssüflənirik”, – ATƏT-in Demokratik Təsisatlar və İnsan haqları Bürosunun (DTİHB) direktoru Matteo Mekakki deyib. “Pandemiya ilə bağlı aydın məhdudiyyətlər olmamasına rəğmən Rusiya hakimiyyətinin müşahidəçi sayını azaltmaqla bağlı təkidi bugünkü addımı qaçılmaz edib”, – o, sözlərinə əlavə edib.
ATƏT dünyada əsas seçki müşahidəsi qurumlarından biridir, 57 üzv ölkədə seçkilərin azad və ədalətli keçməsini müəyyənləşdirmək üçün ekspertlər göndərir. ATƏT-in Parlament Assambleyası da qısamüddətli müşahidə missiyaları yollayır.
Sentyabrın 19-da rusiyalılar parlamentin aşağı palatasının və 39 region parlamentinin üzvlərini, eləcə də doqquz region qubernatorunu seçəcəklər. Bu seçkilər ərəfəsində Rusiyada müxalifətçilərə qarşı sərt repressiyalar həyata keçirir. O cümlədən Aleksey Navalnının siyasi şəbəkəsinə bağlı müxalifətçilər seçki prosesindən uzaqlaşdırılıb.
ATƏT Rusiyada seçkini müşahidə etməyə dəvət olunsa da, müşahidəçi sayı sonradan 60-a salınıb və Rusiya hakimiyyəti bunu ölkədə pandemik vəziyyətin pisləşməsi ilə izah edib. ATƏT ilin əvvəlində deyirdi ki, 80 uzunmüddətli və 420 qısamüddətli müşahidəçiyə ehtiyac var.
“Çox böyük təəssüflə qeyd edirik ki, biz Rusiyadakı qarşıdakı seçkiləri izləyə bilməyəcəyik. Təəssüf ki, Rusiya hakimiyyəti müşahidəçilərin sayının pandemiya ilə bağlı hansısa aydın məhdudiyyətlərin olmadığı bir vaxtda ciddi məhdudlaşdırılmasında israr edib. Nəticədə bizim bugünkü addımımız qaçılmaz olub”,-DTİHB direktoru Matteo Mekaççi təşkilatın saytında yerləşdirilmiş bəyanatında bildirib.
ATƏT PA-nın Prezidenti Marqareta Kederfelt isə müşahidəçi sayına məhdudiyyət qoyulmasından məyusluğunu ifadə edib. “ATƏT-ə az sayda müşahidəçi göndərməyə icazə verilir ki, bu da sadəcə işimizi effektli və hərtərəfli görməyə imkan vermir”, – o vurğulayıb.
Rusiyada isə DTİHB tərəfindən qəbul edilmiş bu qərardan məyusluq ifadə ediblər. Mərkəzi Seçki Komissiyasının sədri Ella Pamfilova bildirib ki, təşkilatın Rusiya seçkilərinə müşahidəçi göndərməmək qərarından dərindən təəssüflənir. “Biz səmimi şəkildə hesab edirdik ki, missiya baş tutacaq və onun iştirakçıları sentyabrda keçiriləcək seçkilərin səviyyəsini, təşkil olunma keyfiyyətini qiymətləndirəcəklər”,-Pamfilova bildirib.
MSK sədri DTİHB-in öz qərarına yenidən baxacağına ümid etdiyini deyib. Və Rusiya tərəfinin müşahidəçilərin sayını məhdudlaşdırmaq tələbinin pandemiya ilə bağlı olduğunu əsaslandırmağa çalışıb. Eyni zamanda deyib ki, DTİHB son iki ildə pandemiya şəraitində seçkiləri izləməklə bağlı təcrübə toplayıb, amma Rusiyaya daha əvvəl missiya göndərdiyi ölkələrdəki müşahidəçilərin sayından “bir az çox” müşahidəçi göndərməkdə israr edirdi.
Pamfilovanın sözlərinə görə, əgər DTİHB müşahidəçi göndərməmək qərarında qətidirsə o zaman “boşalan yeri digər beynəlxalq təşkilatlardan olan müşahidəçilərə verəcəklər”.
