“Taliban” ölkədəki hakimiyyəti ələ keçirdikdən sonra ölkəni tərk edərək, Birləşmiş Ərəb Əmirliklərinə sığınan 72 yaşlı Əfqanıstanın keçmiş prezidenti Əşrəf Qani xalqından üzr istəyib.
Əşrəf Qaninin sözlərinə görə, Kabildən ayrılmaq onun həyatının ən çətin qərarı idi, lakin şəhərin 1990-cı illərdəki vətəndaş müharibəsi zamanı yaşadığı vəziyyəti təkrarlamamaq üçün bu yeganə yol idi. Bu barədə Anadolu agentliyi yazır.
EDNews.net-in məlumatına görə, Qani, deyib ki, xalqını tərk etmək fikri belə yox idi. Lakin, təəssüf ki, onun başqa çarəsi də yox idi. Keçmiş prezident, Birləşmiş Ərəb Əmirliklərinə qaçarkən özü ilə təxminən 169 milyon dollar götürməsi barədə ittihamları da rədd edib.
O, həyatının 20 ilini Əfqanıstanın "demokratik, çiçəklənən və suveren bir dövlət" olmasına həsr etdiyini vurğuladı və onun hakimiyyətinin əvvəlkilərə bənzər faciələrlə başa çatmasından dərin təəssüf hissi keçirdiyini bildirdi.
Daha əvvəl Rusiya səfirliyi bildirmişdi ki, Qani qaçarkən özü ilə Kabildən külli miqdarda pul da aparıb.