Almaniyada seçkiqabağı yarış Parisdə diqqət və narahatlıqla izlənilir. EDNews.net bu barədə “Frankfurter Allgemeine” qəzetinə istinadla xəbər verir. Qeyd olunur ki, Fransa Almaniyadan Avropa təhlükəsizlik və müdafiə siyasətində fəal iştirakını davam etdirəcəyini və Aİ lideri roluna əməl edəcəyini gözləyir. Bu vəziyyətdə Paris üçün ən yaxşı variant Armin Laşetin qələbəsi, ən pis variant isə 2022-ci ilə qədər uzanacaq koalisiya hökumətinin yaradılması ilə bağlı danışıqlar olardı.
Qəzet yazır ki, Fransada Angela Merkelin Almaniya Federativ Respublikasının kansleri vəzifəsindən getməsindən çox kədərlənirlər. Paris növbəti Almaniya hökumətinin Aİ-dəki liderlik roluna uyğun olub-olmayacağından narahatdır. Siyasi analitik Dominik Moyzi qeyd edir ki, əvvəllər Fransa vahid Almaniyanın dominantlığından ehtiyat edirdisə, indi isə onun çox zəifləməsindən qorxur.
Moyzinin qeyd etdiyi kimi, əgər AFR-də seçkilərdən sonra üç partiyadan ibarət koalisiya hökuməti yaradılarsa, onda qərar vermə prosesi, xüsusən təhlükəsizlik və müdafiə sahəsində, çətin olacaq. Eyni zamanda, avropalı tərəfdaşlar Almaniyadan Bundesverin ümumi Avropa təhlükəsizliyinin formalaşmasında fəal iştirakını gözləyirlər. Moyzi müdafiə məsələlərində fəal iştirak etməyən və “antimilitarizmlə flört edən” sosial demokratların rolunu xüsusilə tənqid edir.
Qəzet yazır ki, eyni zamanda Emmanuel Makron da Almaniyada keçiriləcək seçkilərdə kimə üstünlük verdiyini büruzə verməməyə çalışır. Fransa prezidenti həm xristian demokratların namizədi Armin Laşet, həm də sosial demokratların namizədi Olaf Şoltsla danışıb və həmçinin “yaşıllar”ın namizəd Annalena Berbok və Azad Demokratlar Partiyasının sədri Kristian Lindnerlə ünsiyyətə açıq olduğunu söyləyib.
“Frankfurter Allgemeine” yazır ki, Parisin nöqteyi-nəzərinə görə, Armin Laşet Merkelin təhlükəsizlik və müdafiə sahəsində ən yaxşı varisidir. Ancaq fransız politoloq Pol Moris qeyd edir ki, Laşetə koalisiya tərəfdaşlarının nüfuzunun az olması mane ola bilər.
Qəzet qeyd edir ki, Fransa üçün ən pis ssenari koalisiya hökumətinin qurulması ilə bağlı danışıqların 2022-ci ilə qədər uzana biləcəyi ehtimalıdır. Fakt budur ki, 2022-ci ilin birinci yarısında Aİ Şurasına sədrlik Fransaya keçəcək: bu zaman qeyd olunan planları həyata keçirmək üçün Parisin danışıqlar apara biləcəyi Almaniya hökumətinə ehtiyacı olacaq.
“Frankfurter Allgemeine” bildiririr ki, bu arada Merkelin idarəetməsi Fransa cəmiyyətində yüksək qiymətləndirilir. Ipsos-un apardığı sorğuya görə, fransızların 75% -i Almaniya kansleri haqqında müsbət fikirdədir. 64% Almaniyanı etibarlı tərəfdaş hesab edir. Qeyd olunur ki, Merkel Avropa İttifaqının lideri kimi qəbul edilib. Politoloq Yana Puqler qeyd edib ki, Avropa müdafiə siyasətində irəliləyiş yalnız Almaniyanın hazırda yürütdüyü aydın xətt davam edəcəyi və yeni hökumətin Merkelin prinsiplərinə sadiq qalacağı təqdirdə baş verə bilər.