Şimali Kipr Türk Cümhuriyyətinin prezidenti Ərsin Tatar Azərbaycan xalqını 28 May Müstəqillik Günü münasibətilə təbrik edib.
"Bu gün Azərbaycanın öz azadlığını və suverenliyini əldə etdiyi Müstəqillik Gününün ildönümüdür... Azərbaycan dövləti və azərbaycanlı qardaşlarımızla hər sahədə əlaqələrimizi daha da yaxşılaşdırmaq, Azərbaycan ilə aramızda sosial və mədəni əlaqələri inkişaf etdirmək ən böyük məqsədlərimizdən biridir.
Biz böyük Türk millətinin övladları olaraq, aramızda olan mənəvi, sosial, iqtisadi və mədəni dəyərlərin güclənməsi ilə gələcəyə daha çox ümidlə baxa biləcəyimizin fərqindəyik və buna əminik. Şübhə yoxdur ki, ən qısa zamanda iki dövlət arasında siyasi əlaqələr ən yüksək səviyyəyə yüksələcək.
Kipr türkləri ilə Azərbaycan xalqı arasındakı sevgi bağı daim möhkəmlənəcək və inkişaf edəcəkdir. Bir millətin övladları kimi bilirəm ki, sizin də ürəyiniz bizimlədir. Bizim taleyimiz və gələcəyimiz birdir. Türkiyə, Azərbaycan və ŞKTC “bir millət, üç dövlət” olaraq hər şəraitdə həmişə bir bütün olacaq".
Ərsin Tatar Azərbaycanı bir daha Qarabağda qazandığı Zəfər münasibətilə təbrik edib.
"Bu hiss və düşüncələrlə Qarabağı böyük dastan yazaraq azad edən qardaş Azərbaycanı bu böyük qələbə münasibətilə bir daha təbrik edirəm. Müstəqillik uğrunda şəhid olan bütün şəhidlərimizi rəhmət və hörmətlə yad edir, bütün azərbaycanlı qardaşlarıma can sağlığı arzulayıram".