Rusiyada bu gün jurnalist İvan Safronova çıxarılan hökm son 20 ildə dövlətə xəyanətlə bağlı ən ağır hökmlərdən biridir.
Ednews xəbər verir ki, son 20 ildə dövlətə xəyanətə görə ən ağır həbs cəzası Xarici Kəşfiyyat Xidmətinin keçmiş polkovniki Aleksandr Poteev barəsində çıxarılıb.
Belə ki, o, 2011-ci ildə Anna Çapman daxil olmaqla, Rusiya kəşfiyyatçılarının şəbəkəsi haqqında məlumatları ABŞ-a təhvil verdiyinə görə qiyabi olaraq 25 il həbs cəzasına məhkum edilib.
2003-cü ildə Moskva Hərbi Dairəsinin məhkəməsi Xarici Kəşfiyyat Xidmətinin əks-kəşfiyyat idarəsinin birinci şöbəsinin rəis müavini Aleksandr Zaporojskini dövlətə xəyanətdə və ABŞ-ın xeyrinə casusluqda ittiham edərək 18 il müddətinə azadlıqdan məhrum edib.
2004-cü ildə Moskva Şəhər Məhkəməsi Rusiya Elmlər Akademiyasının ABŞ və Kanada üzrə İnstitutunun əməkdaşı İqor Sutyaqini cəzasını ciddi rejimli koloniyada çəkməklə 15 il müddətinə azadlıqdan məhrum edib. O, dövlət sirlərini ehtiva edən məlumatları ABŞ-a ötürməkdə ittiham olunub.
Elə həmin il krasnoyarsklı fizik Valentin Danilov cəzasını ciddi rejimli koloniyada çəkməklə 14 il həbs cəzasına məhkum edilib. 2005-ci ilin iyununda Ali Məhkəmə onun cəzasını bir il azalaraq 13 ilə endirib. Danilov Çinin xeyrinə dövlətə xəyanətdə ittiham olunub.
2006-cı ildə məhkəmə “QRU”-nun (Baş Kəşfiyyat İdarəsi) keçmiş polkovniki Sergey Skripalı Böyük Britaniyanın xeyrinə vətənə xəyanətdə təqsirli bilib və 13 il müddətinə azadlıqdan məhrum edib. 2010-cu ildə o, Vladimir Putin tərəfindən əfv edilib və mübadilə çərçivəsində Böyük Britaniyaya təhvil verilib. 2018-ci ildə Britaniya rəsmiləri Skripalın Rusiya kəşfiyyatı tərəfindən zəhərləndiyini bildiriblər.
2012-ci ildə “Voenmex” Baltik Dövlət Texniki Universitetinin iki professoru Svyatoslav Bobışev və Yevgeni Afanasyev Çinin xeyrinə vətənə xəyanətdə ittiham olunaraq, müvafiq olaraq 12,5 il və 12 il sərt rejimli həbs cəzası alıblar. 2015-ci ildə Rusiya silahlı qüvvələrinin keçmiş polkovniki Teymuraz Əliyev Gürcüstanın xeyrinə dövlətə xəyanətdə təqsirli bilinib. Ona 18 il həbs cəzası verilib.
2016-cı ildə keçmiş FSB (Federal Təhlükəsizlik Xidməti) zabiti və Rus Pravoslav Kilsəsinin xarici əlaqələr şöbəsinin əməkdaşı Yevgeni Petrin strateji əhəmiyyətli məlumatları ABŞ kəşfiyyat orqanlarına ötürdüyünə görə 12 il müddətinə azadlıqdan məhrum edilib.
2016-cı ildə Mərkəzi Elmi-Tədqiqat Maşınqayırma İnstitutunun 76 yaşlı əməkdaşı Vladimir Lapıgin Çinə məlumat ötürdüyünə görə 7 il müddətinə azadlıqdan məhrum edilib. O, 2020-ci ilin əvvəlində vaxtından əvvəl azad edilib.
2019-cu ildə FSB İnformasiya Təhlükəsizliyi Mərkəzinin Əməliyyat Şöbəsinin keçmiş rəisi Sergey Mixaylov FBI (Federal Təhqiqatlar Bürosu) ilə əməkdaşlıqda ittiham edilərək cəzasını sərt rejimli koloniyada çəkməklə 22 il müddətinə azadlıqdan məhrum edilib.
Qeyd edək ki, Moskva Şəhər Məhkəməsi “Roskosmos” rəhbərinin keçmiş müşaviri, jurnalist İvan Safronovu dövlətə xəyanətdə təqsirli bilərək 22 il müddətinə azadlıqdan məhrum edib. Safronov NATO ölkələrinin kəşfiyyatı ilə əməkdaşlıqda, onlara məxfi məlumatlar ötürməkdə ittiham olunub.